یاریزانێکی بەرشەلۆنە ئامادەیە مووچەکەی بۆ نیوەی کەم بکاتەوە

پەیام سپۆڕت - بڕیار تەها
فرێنکی دی یۆنگی هۆڵەندی و یاریزانی هێڵی ناوەندی یانەی بەرشەلۆنەوە لە پێناو درێژکردنەوەی گرێبەستەکەی لەگەڵ یانە کەتەلۆنییەکە ئامادەیە مووچەکەی بۆ نیوە کەم بکاتەوە.

  بۆندی ئێستای یاریزان هۆڵەندییەکە لەگەڵ بلاوگرانا هاوینی 2026 کۆتایی دێت، واتا تەنیا ئەم وەرزە لە گرێبەستەکەی ماوە، بەپێی زانیارییەکانی کەناڵی ئیڵ چیرینگیتوی ئیسپانی، دی یۆنگ ڕەزامەندی نیشانداوە مووچەکەی بە ڕیژەی لە ٪50 کەم بکرێتەوە ئەمەش لە پێناو ئەوەی بۆ دوو وەرزی دیکە گرێبەستەکەی لەگەڵ یانەی بەرشەلۆنە درێژ بکاتەوە و لە ڕیزەکانی ئەو یانەیە بەردەوام بێت.

ئەو کەناڵە ئاشکرای کردووە، مووچەی ئێستای دی یۆنگ لە نێوان 18 بۆ 19 ملیۆن یۆرۆی ساڵانەدایە و ئامادەیە بۆ نۆ ملیۆن یۆرۆ کەمی بکاتەوە، تائەوەی هاوکاری یانەکەی بکات بۆ یاسای یەک بە یەکی لالیگا و یاسای دارایی خاوێن.

هەر بەپێی ڕێککەوتنی نێوان یاریزانەکە و یانەکە بێت، بۆندە نوێیەکە بژاردەی نوێکردنەوەشی بۆ یەک وەرزی دیکە و تاکو هاوینی 2029 لەگەڵ دەبێت.

دی یۆنگی تەمەن 28 ساڵ لەم دواییانەدا بریکارەکەی گۆڕی، ئەو هەنگاوەش یارمەتیدەر بوو بۆ ئاسانکاری دانوستانەکان و گەیشتن بە ڕێککەوتنی سەرەتایی لەگەڵ یانەکەیدا.