ناپۆلی بەهۆی پێکانە سەختەکەی لوکاکۆوە ناچارە هێرشبەرێک بگوازێتەوە

پەیام سپۆڕت - مەڕوان تاڵیب

یانەی ناپۆلی ئیتاڵی بەهۆی پێکانە سەختەکەی ڕۆمیلۆ لوکاکۆوە ناچارە هێرشبەرێک بگوازێتەوە، کە تاکو ساڵی نوێ ناگەڕێتەوە.

 هێرشبەرە بەلجیکییەکە لە یاریی دۆستانەی تیپەکەی بەرانبەر ئۆڵمپیاکۆسی یۆنانی دووچاری پێکان هات و ئەوەش وایکرد کۆنتی ڕاهێنەر بە تووندی هێرش بکاتە سەر یاریزانەکەی یانە یۆنانییەکە.

فابریزیۆ ڕۆمانۆ لە تۆڕی سکای سپۆڕت بە پشت بەستن بە بڵاوکراوەکەی ناپۆلی لەسەر پێکانەکەی هێرشبەرەکە ئاشکرای کردووە، لوکاکۆ لە ماسولکەکانی ڕانی چەپیدا دووچاری پێکانێکی سەخت هاتووە و بەو هۆیەوە لانیکەم سێ مانگ لە یاریگاکان دوور دەکەوێتەوە و بەشی یەکەمی وەرزەکە لەگەڵ ناپۆلی لەدەست دەدات و تاکو سەرەتایی ساڵی نوێ ناگەڕێتەوە.

بەپێی ڕۆمانۆش بێت، لە ئێستادا بەرپرسانی ناپۆلی بەدوای جێگرەوەی لوکاکۆدا دەگەڕێن لە مێرکاتۆدا و دەیانەوێت شوێنەکەی تاکو گەڕانەوەی پڕ بکەنەوە.

لوکاکۆ لە وەرزی ڕابردوودا ڕۆڵی سەرەکی بینی لە بەدەستهێنانی نازناوی خولی ئیتاڵیا لەلایەن ناپۆلیەوە، لە 36 یاریدا 14 گۆڵی تۆمارکرد و 10 ئەسیستیشی دروست کرد.