دەرچووانی دانەمەزراوی هەڵەبجە هەڕەشەی گرتنەبەری ڕێكاری یاسایی دژی دامەزراندنی 52 كەس دەكەن

پەیام

لە سێیەمین گردبوونەوەیاندا لە بەردەم دیوانی پارێزگای هەڵەبجە، دەرچووانی زانكۆ و پەیمانگاكانی سنووری پارێزگای هەڵەبجە، كە تا ئێستا دانەمەزراون، دووپاتیان كردەوە كە بەردەوام دەبن لە فشارەكانیان بۆ هەڵوەشاندنەوەی بڕیاری دامەزراندنی 52 كەس كە بە "تەزكیەی حزبی و خزم خزمێنە"دامەزراون.

دەرچووە دانەمەزراوەكان لە گردبوونەوەكەدا، داوای شەفافیەت و دادپەروەرییان لە پرۆسەی دامەزراندندا دەكرد.

بە وتەی نوێنەرانی دەرچووان، ئەو 52 كەسەی دامەزراون، مەرجەكانی دامەزراندنی گشتییان تێدا نییە و تەنها لەسەر بنەمای پەیوەندی حزبی و خزمایەتی وەرگیراون، ئەمەش ناڕەزایەتییەكی بەرفراوانی لەنێو دەرچووانی دیكەدا لێكەوتووەتەوە كە ساڵانێكی زۆرە چاوەڕێی دەرفەتی كارن.

دەرچووە دانەمەرزراوەكان ڕایانگەیاند، كە چیتر قبوڵ ناكرێت دەرفەتی كار بە تەزكیەی حزبی و بە پشتوپەنا بدرێت بە خەڵك، لە كاتێكدا سەدان گەنجی خاوەن بڕوانامە لە ماڵەوە دانیشتوون و بێكارن.

ئەو دەرچووانە ئاماژەیان بەوەش دا، كە ئەوان هەوڵەكانیان چڕتر دەكەنەوە و گەیشتوونەتە ئەو بڕیارەی كە هەفتەی داهاتوو دۆسیەی ئەم دامەزراندنە نایاساییە ببەنە دادگا.