لیبیا.. 21 كۆچبەری خەڵكی هەرێمی كوردستان دۆزرانەوە و عێراق دەیانگەڕێنێتەوە

پەیام

دوای دەستگیركردنیان لەلایەن هێزە ئەمنییەكانی لیبیاوە، 21 كۆچبەری خەڵكی هەرێمی كوردستان دۆزرانەوە و ئارەزوومەندانە دەگەڕێنرێنەوە.

ئەحمەد سەحاف، كاربەڕێكەری باڵیۆزخانەی عێراق لە لیبیا ڕایگەیاند، دوای ئەوەی ئاگادار كراونەتەوە، بەدواداچوونیان كردووە و توانیویانە 21 كۆچبەری خەڵكی هەرێمی كوردستان بدۆزنەوە كە لەلایەن هێزە ئەمنییەكانی لیبیاوە دەستگیر كرابوون.

ئەحمەد سەحاف ڕاشیگەیاند، ئەو كەسانە بە شێوازی نایاسایی هاتوونەتە ناو خاكی لیبیاوە، ئێستا ئەو كەسانە لە باڵیۆزخانەی عێراق نیشتەجێ كراون و ڕێكارەكانی گەڕانەوەیان بۆ عێراق گیراوەتە بەر.

جەختیشی كردەوە, گەڕانەوەی ئەو كۆچبەرانە ئارەزوومەندانەیە، باڵیۆزخانەی عێراق ئاسانكارییان بۆ دەكات و بەبێ بەرانبەر تكتی فڕۆكەیان بۆ دابین دەكرێت.

لیبیا وڵاتێكی كیشوەری ئەفریقایە و دەكەوێتە سەر دەریای ناوەڕاست، بەهۆی ئەوەی بەرانبەر ئیتاڵیایە لە بەری ئەورووپاوە, ماوەی چەند ساڵێكە بووەتە ڕێگای كۆچبەرانی نایاساییو ئەوانەی بەرەو ئەورووپا دەڕۆن، بەڵام ڕۆژانە هەواڵی دەستبەسەركردنی كۆچبەران لە لیبیا بڵاو دەبێتەوە و ئێستا وەك ڕیگایەكی ئاسان بۆ كۆچكردن هەژمار ناكرێت.