محەمەد شیاع سودانی، سەرۆكی دیوانی وەقفی سوننی لە پۆستەكەی دوورخستەوە

پەیام

محەمەد شیاع سودانی سەرۆكی دیوانی وەقفی سوننی لە پۆستەكەی دوورخستەوە، عامر شاكر بە وەكالەت راسپێردرا.

نووسینگەی ڕاگەیاندنی محەمەد شیاع سودانی سەرۆكوەزیرانی عێراق، ئەمڕۆ ڕایگەیاند، كە بە فەرمانێكی سەرۆكوەزیران، مەشعان موحی خەرزەجی، سەرۆكی دیوانی وەقفی سوننی، لە پۆستەكەی دوورخراوەتەوە.

ئەم بڕیارە لەسەر بنەمای نووسراوێكی ئەنجومەنی فیقهیی عێراق دراوە، كە بەشێكە لە هەوڵەكانی حكومەت بۆ چاكسازی و ڕێكخستنەوەی دامەزراوە حكومییەكان.

بەپێی ڕاگەیاندراوەكە، عامر شاكر جەنابی لەلایەن سەرۆكوەزیرانەوە ڕاسپێردراوە تا بۆ ماوەی شەش مانگ بە وەكالەت پۆستی سەرۆكی دیوانی وەقفی سوننی بەڕێوەببات.

چاوەڕوان دەكرێت لە ماوەی ئەم شەش مانگەدا ڕێكارەكانی هەڵبژاردن و دیاریكردنی سەرۆكێكی نوێ بۆ دیوانی وەقف تەواو بكرێن.

ئاماژە بەوەشكراوە كە سێ ئەندامی وەقفی سوننە خۆیان بۆ پڕكردنەوەی ئەو پۆستە بەربژێر كردووە، ئەوەیش بەپێی مادەی دووەمی یاسای وەقفی سوننی (ژمارە 56ی ساڵی 2012)، كە ڕێگە بە كاندیدكردنی كەسایەتییە ئایینی و كارگێڕییە دیارەكان دەدات بۆ ئەو پۆستە.