دارایی عێراق: بڕی پێویستی ڕاستەقینەی مووچە شەش تریلیۆن دینارە و هی كورتهێنانێكیش نییە

پەیام
وەزارەتی دارایی عێراق بڕی پێویستی خەرجیی ڕاستەقینەی مووچەی مانگانە بە شەش تریلیۆن دینار ئاشكرا دەكات و ڕایشیدەگەیەنێت: سەرجەم بڕەكە دەستەبەر كراوە.

لە ڕوونكردنەوەیەكدا، وەزارەتی دارایی عێراق ڕایگەیاند: ژمارە فەرمییەكان دەری دەخەن كۆی خەرجیی مووچە كە (فەرمانبەران، خانەنشینان و تۆڕی چاودێری كۆمەڵایەتی) دەگرێتەوە، دەگاتە شەش تریلیۆن دیناری مانگانە.
وەزارەتی دارایی ڕایشیگەیاند: ئەو بڕەش لەگەڵ داهاتی بەدەستهاتوو دێتەوە.
وەزارەتەكە هەموو ئەو بانگەشانەشی ڕەت كردەوە كە دەڵێن قەبارەی خەرجیی مانگانەی مووچە هەشت تریلیۆن و 500 ملیار دینارە و گوایە كورتهێنان لە خەرجكردنی مووچەی مانگانەدا هەیە و ڕایشیگەیاند: ئەوە لە ڕووی ژمێریاری و داراییەوە لێكدانەوەیەكی ورد نییە.
سەبارەت وادەی خەرجكردنی مووچەی خانەنشینان و چاودێری كۆمەڵایەتی، وەزارەتەكە ڕوونی كردووەتەوە "دیارییكردنی دووەم ڕۆژی هەموو مانگێك بۆ خەرجكردنی مووچەی ئەو توێژانە، لەبری 17ی مانگ، لە ئەنجامی ڕێوشوێنەكانی ڕێكخستنی پێشتر بووە، بەر لە دەركردنی كارتی بانكی، تاوەكو خانەنشینان لە ڕیزی دوور و درێژدا بۆ وەرگرتنی مووچەكانیان نەوەستن".
وەزارەتەكە دووبارە پابەندیی تەواوی خۆی بەرانبەر چینی خانەنشینان دەربڕی كە كاری هەرە پێشینەی دەبێت، جەخت دەكاتەوە كە مافە داراییەكان بە تەواوی دەستەبەر كراون.