ئەمریكا.. تەنیا لە دوو ڕۆژدا هەشت كەس كوژراون و 32 ى دیکەش بریندار بوون

پەیام 

تەنیا لە ماوەى دوو ڕۆژدا لە ئەمریکا هەشت كەس كوژراون و 32 ى دیکەش بریندار بوون.

لە ڕووداوێكی تەقەكردندا لە ویلایەتی ساوس كارۆلینای ئەمریكا، چوار كەس كوژران و زیاد لە 20ی دیكەیش بریندار بوون، ئەوەش دووەم ڕووداوە لە ماوەی دوو ڕۆژدا كە بەهۆیانەوە هەشت كەس كوژراون.

نوسینگەی فەرماندەی پۆلیسی بیۆفۆرت لە ڕاگەیەنراوێكدا ڕایگەیاند، ڕۆژی یەكشەممە دوای ئاگاداركردنەوەیان لە ڕووداوێكی تەقەكردن لە باڕێكدا لە دوورگەی سان هیلینا، پاش گەیشتنیان بە شوێنەكە بەدییان كرد، كە ژمارەیەكی زۆر بە دەستڕێژی گوللە پێكران و لەسەر زەوییەكە كەوتوون.

هەروەها ئاشكرایكرد، بەهۆی ڕووداوەكەوە چوار كەس گیانیان لەدەست دا و زیاد لە 20 كەسی دیكە بریندار بوون، پۆلیس دەستی بە لێكۆڵینەوە كردووە.

 دوورگەی سان هیلینا بەوە ناسراوە، كە زیاتر دانیشتووانەكەی ڕەشپێستن و خەڵكی بەڕەگەز ئەفریقی لێ نیشتەجێیە.

ئەم ڕووداوە لە كاتێكدایە پێشتریش ڕۆژی شەممە، لە ڕووداوێكی دیكەی تەقەكردندا لە ویلایەتی مسی سیبی هەر لە ئەمریكا، چوار كەس كوژران و 12 كەسی دیكە بریندار بوون، تەقەكەرەكەش دەستگیر نەكراوە.