15/11/2025
280 جار خوێنراوەتەوە
ئەنجوومەنی ئاسایش دەنگ لەسەر پڕۆژەبڕیارەكەی ترەمپ لەبارەی غــ.ەززەوە دەدات
پەیام
سەرچاوە دیپلۆماسییەكان ڕایانگەیاند، ڕۆژی دووشەممە ئەنجوومەنی ئاسایشی نێودەوڵەتی دەنگ لەسەر پڕۆژەبڕیارێكی ئەمریكا دەدات كە پشتیوانی لە پلانی دۆناڵد ترەمپ سەرۆكی ئەمریكا بۆ ئاشتی لە غەززە دەكات.
ئەمریكا و ژمارەیەك لە هاوبەشەكانی، لەوانەش میسر، قەتەر، سعودیە و توركیا، دوێنێ داوایان لە ئەنجوومەنی ئاسایش كرد "بەپەلە" پڕۆژە بڕیارەكە پەسەند بكات.
هاوكات قەتەر، میسر، ئیمارات، سعودیە، ئیندۆنیزیا، پاكستان، ئوردن و توركیا لە بەیاننامەیەكدا "پشتیوانیی هاوبەشی" خۆیان بۆ پڕۆژە بڕیارەكەی ئەمریكا دەربڕی كە مۆڵەت دەدات بە پێكهێنانی هێزێكی سەقامگیری نێودەوڵەتی و چەند بابەتێكی تر، هیوایان خواست "بە زوویی" پەسەند بكرێت.
هەفتەی ڕابردوو ئەمریكییەكان بە فەرمی گفتوگۆیان لەناو ئەنجوومەنی ئاسایشی نێودەوڵەتی، لەسەر دەقێك دەستپێكرد، كە بەدواداچوونێكە بۆ ئاگربەستی شەڕی دوو ساڵەی نێوان قەوارەی زایۆنی و حەماس، دەقەكەش پشتیوانی لە پلانەكەی ترەمپ دەكات.
واشنتۆن و هاوبەشەكانی لە بەیاننامەكەدا وتیان: جەخت دەكەینەوە، كە ئەمە هەوڵێكی ڕاستگۆیانەیە، پلانەكە ڕێگایەكی پراكتیكی بۆ ئاشتی و سەقامگیری دابین دەكات، نەك تەنیا لەنێوان ئیسرائیلییەكان و فەلەستینییەكان، بەڵكو بۆ هەموو ناوچەكەش.
بەپێی هەواڵی ئاژانسی فرانس پرێس، پڕۆژە بڕیارەكە پێشوازی لە دامەزراندنی "ئەنجوومەنی ئاشتی" دەكات، كە دەستەیەكی حوكمڕانی كاتی یان ڕاگوزەرە بۆ غەززە و ترەمپ بەشێوەیەكی تیۆری سەرۆكایەتی دەكات، تا كۆتایی ساڵی 2027 بەردەوام دەبێت.
لە تۆڕە کۆمەڵایەتیەکان شەیری بکە