هێزەکانى سەر بە پارتى سەدان کەسیان لە دانیشتووانى گوندی لاجان ئاوارە کرد

پەیام 

لە نیوەڕۆی ئەمڕۆوە هێزێكی ئەمنیی سەر بە پارتی چووەتە سەر گوندی لاجان و ماڵ و حاڵی بە خەڵك چۆڵ كردووە، بەوهۆیەوە زیاتر لە هەزار كەس لە ژن و منداڵ و پیر ئاوارەی بوون.

ئەمڕۆ جارێكی دیكە دۆخی گوندی لاجان لە نزیك گوێڕ لە سنووری پارێزگای هەولێر، ئاڵۆز بووەوە، ژمارەیەكی زۆر لە هێزە ئەمنییەكان سەر بە لەشكری گوڵانی پارتی، لە دوێنێوە گەمارۆی گوندەكەیان داوە، بە پاساوی بوونی تۆمەتبار و چەك لە گوندەكەدا. 

پەیامنێری پەیام ڕایگەیاند، ئەمڕۆ ئەو هێزە ئەمنییە لە مزگەوتی ناو گوندەكەوە جاڕیان دا و داوایان لە خەڵكەكەی كرد چۆڵی بكەن، بەوهۆیەوە هەموو دانیشتووانی گوندەكە چەند كیلۆمەترێك لە دەرەوەی گوندەكەیان لەسەر ڕێگای هەولێر ئاوارە بوون.

ئێوارەی ئەمڕۆ هێزی زیاتری ئەمنی لە هەولێرەوە ڕەوانەی گوندی لاجان كرا و، دۆخێكی ئەمنیی توند بەسەر ناوچەكەدا سەپێندراوە. دانیشتووانی لاجان دەڵێن: تا كێشەكەمان چارەسەر نەكرێت، ناگەڕێینەوە.

دانیشتووانی گوندەكە نیگەران و تووڕەن لە مامەڵەی خراپی هێزە ئەمیینەكان و، رایدەگەیەنن بەرپرسیارێتیی هەر ڕووداوێكی نەخوازراو لە ئەستۆی حكومەتی هەرێمە.

دوو ڕۆژ لەمەوبەر ژمارەیەك هاووڵاتیی گوندی لاجان لەبەردەم پاڵاوگەی نەوتی لاناز خۆپیشاندانیان ئەنجام دا، لە بەرانبەردا پاسەوانانی پاڵاوگەكە و هێزە ئەمنییەكان دەستڕێژی گوللەیان لێ كردن، بەو هۆیەوە پێكدادان و ڕووبەڕووبوونەوە دروست بوو، لە ئەنجامدا بەلای كەمەوە كەسێك كوژرا و نزیكەی 10 كەسیش بریندار بوون.
پاڵاوگەی لاناز دەكەوێتە تەنیشت گوندی لاجان، دانیشتووانی گوندەكە پێشتریش چەندین جار خۆپیشاندانیان ئەنجام داوە و داوایان كردووە هەلی كار بۆ ئەوانیش لە پاڵاوگەكە بڕەخسێنرێت، وەكوو خۆیشیان دەڵێن بەر لە هەڵبژاردن بەڵینیان پێداون، بەڵام ئێستا پاشگەزبوونەتەوە.