لە هەرێم 87 حاڵەتی تووشبوون بە ئایدز تۆمارکراوە کە 64یان بیانیین

پەیام 

وەزارەتی تەندروستی ڕایدەگەیەنێت، ئەمساڵ 87 حاڵەتی تووشبوو بە ئایدزیان لە هەرێمی كوردستان تۆمار كردووە، کە 64یان بیانی و  23 حاڵەتیشیان هاووڵاتییانی ناوخۆیین.

 لە ڕۆژی جیهانی ئایدزدا وەزارەتی تەندروستیی حكومەتی ماوەبەسەرچووی هەرێمی كوردستان بڵاوی كردەوە، لە ماوەی یازدە مانگی ڕابردوودا، تەنیا لە كەرتی گشتی، نزیكەی 609 هەزار و 306 پشكنین ئەنجامدراوە بەتایبەتی بۆ هەموو ئەو بیانییانەی كە خواستی ئەوەیان هەبووە لە هەرێم نیشتەجێ بن، هەروەها پشكنینەكان بۆ هەموو ئەو بوتڵە خوێنانە كراوە كە بەخشراون.

وەزارەتی تەندروستی ڕاشیگەیاندووە: "لە دەرەنجامی پشكنینەكاندا، تەنیا 87 حاڵەتی نوێی تووشبوو بە ئایدز دەستنیشان كراوە كە تێیدا 64 حاڵەتی بیانی و هاووڵاتییانی دەرەوەی هەرێمی كوردستانن و 23 حاڵەتیش هاووڵاتییانی ناوخۆیین، هەروەها هەموو حاڵەتەكانی ئێستا و ساڵانی ڕابردووش لەژێر چاودێریی تەندروستی و خۆپارێزیدان كە ژمارەی تێكڕای هەموو ساڵەكان 150 حاڵەتی هەڵگری ڤایرۆسی ئەیدزن و بەردەوام پشكنینیان بۆ دەكرێت".

ئایدز نەخۆشییەكی ڤایرۆسیی درمە واتا لە كەسێكەوە بۆ كەسێكی تر دەگوازرێتەوە بەهۆی ڕێگاكانی خوێن یان پەیوەندیی ناشەرعی یان دایك بۆ كۆرپە یان هەر بەركەوتەیەكی ڕاستەوخۆی خوێن و دەردراوەكانی دیكەی كە هەڵگری ڤایرۆسەكە بن.