ئاوارەكردنی دانیشتووانی گوندی لاجان كاردانەوەی توندى هەركییەكانی بەدوادا هات

پەیام
 
ئاوارەكردنی دانیشتووانی گوندی لاجان كاردانەوەی هەركییەكانی قەزای خەباتی بەدوادا هات، خۆپیشاندانی گەورە سەری هەڵداوە و چەندین بارەگای حكومەت و پارتی سووتێنران.

پاش ئاوارەكردنی خەڵكی لاجان لەلایەن هێزە ئەمنییەكانی سەر بە پارتییەوە، حەیدەر هەركی، برای خورشید هەركی، لە پەیامێكی ڤیدیۆییدا داوای لە هەركییەكانی سنووری قەزای خەبات كرد بۆ پاڵپشتی لە دانیشتووانی گوندی لاجان ڕاپەڕن و ڕێگا بگرن.

حەیدەر هەركی داوای لە هەركییەكان كرد ئەم زوڵمە قبووڵ نەكەن و، هەڕەشەی كاردانەوەی توندیشی كرد، ئەگەر بەزوویی ئەو هێزەی چووەتە سەر گوندی لاجان ناوچەكە چۆڵ نەكات.

دوای پەیامەكەی حەیدەر هەركی، هەركییەكانی قەزای خەبات ڕژانە سەر شەقام و دەستیان بە خۆپیشاندان كرد، هەروەها ڕێگای سەرەكیی هەولێر-مووسڵیان داخست.

بەپێی ژمارەیەك گرتەی ڤیدیۆیی تایبەت كە بۆ پەیام نێردراوە، لە خەبات ژمارەیەك بارەگای پارتی و بینای حكومی سووتێنراون.

لە ناحیەی كەڵەكیش خۆپیشاندانی فراوان بۆ پشتیوانی لە گوندی لاجان بەڕێوە دەچێت، ژمارەیەك ناوەندی حكومی لەلایەن خۆپیشاندەرانەوە سووتێنران.

خۆپیشاندەرێك لە خەباتەوە بە پەیامی ڕاگەیاند، هەموو شوێنەكانمان كۆنترۆڵ كردووە و بەردەوام دەبین لە خۆپیشاندان تا ئەو دۆخەی بەسەر خەڵكی گوندی لاجاندا سەپێندراوە كۆتایی دێت.