پزیشكیان پڕۆژەیاسای بودجەی 2026ی بە سڕینەوەی چوار سفرەوە پێشكەشكرد

پەیام 

سەرۆككۆماری ئێران یەكەم پڕۆژەیاسای بودجەی ساڵی نوێی وڵاتەكەی، دوای سڕینەوەی چوار سفری سەر دراوەكەی ئاراستەی پەرلەمان كرد..

مەسعود پزیكشیان سەرۆکكۆماری ئێران پڕۆژە یاسای نوێی ساڵی داهاتووى پێشكەش بە ئەنجومەن كرد كە لە مانگی ئازاری 2026 دەستپێدەكات وەك سەرەتای ساڵ لە ئێران، پڕۆژەكە بە مێژوویی دادەنرێت چونكە یەكەمین بودجەی فەرمییە بە دراوی "ڕیاڵی نوێ" و دوای لادانی چوار سفر لە دراوی نیشتمانی نووسراوەتەوە. 
پزیشكیان لە كاتی پێشكەشكردنی بودجەكەدا بە ڕۆژنامەنووسانی ڕاگەیاند، كە حكومەتەكەی سیاسەتی "دەستپێوەگرتن" پەیڕەو دەكات، بەڵام هەموو هەوڵێكیان بۆ ئەوەیە، كە هاووڵاتییان بتوانن لانی كەمی پێداویستییەكانی ژیانیان لە ناو جەرگەی هەڵئاوسانی بەرزدا دابین بكەن.

سەبارەت بە پشتیوانییە داراییەكان، پڕۆژەكە پێشنیازی كردووە مووچەی فەرمانبەران، خانەنشینان، سەربازان و سوودمەندانی هاوكارییە كۆمەڵایەتییەكان بە ڕێژەی سەدا 20 زیاد بكرێت، بۆ ئەم مەبەستە و بۆ قەرەبووكردنەوەی هێزی كڕینی مووچەخۆران، بڕی 100 ملیار تمەن كە دەكاتە نزیكەی 770 هەزار دۆلار تەرخان كراوە، ئەمەش نیشانەی هەوڵی حكومەتە بۆ ڕێگریكردن لە داڕمانی زیاتری باری دارایی كارمەندانی دەوڵەت لە سایەی بەردەوامیی قەیرانی هەڵئاوساندا.