قه‌ته‌ر: ئێران به‌ كردنه‌ ئامانجی وڵاتان هاوسه‌نگی ناوچه‌كه‌ تێك ده‌دات

په‌یام

وەزارەتی دەرەوەی قەتەر لە ڕاگەیەندراوێکی بەپەلەدا، سەرکۆنەی هێرشەکانی ئێرانی کرد کە کراونەتە سەر تورکیا لە ڕێگەی مووشەکی بالیستی و هه‌روه‌ها هێرش بۆسه‌ر ئازەربایجان لە ڕێگەی فڕۆکەی بێفڕۆکەوانەوە.

قەتەر هۆشداری دا کە بەردەوامبوونی تاران لە کردنەوەی بەرەی نوێی شەڕ و فراوانکردنی بازنەی گرژییەکان لەگەڵ وڵاتانی دراوسێ، کارێکی ئێجگار مەترسیدارە و دەبێتە هۆی تێکدانی تەواوی هاوسەنگیی ناوچەکە.
لە لایەکی دیکەوە، سەرۆک وەزیرانی قەتەر لە پەیوەندییەکی تەلەفۆنیدا لەگەڵ ڕاوێژکاری نەمسا، جەختی لەوە کردەوە کە هەر جۆرە دەستدرێژییەکی ئێران بۆ سەر خاکی قەتەر، پێشێلکارییەکی زەق و ئاشکرای سەروەریی وڵاتەکەیەتی. ناوبراو داوای کرد کە دەستبەجێ هەموو جۆرە کارێکی توندوتیژی و گرژی بنبڕ بکرێت و لایەنەکان بگەڕێنەوە سەر مێزی گفتوگۆ بۆ چارەسەرکردنی کێشەکان بە شێوەیەکی ئاشتییانە.
حکومەتی قەتەر داوای لە کۆمەڵگەی نێودەوڵەتی کرد کە فشار بخەنە سەر تاران بۆ ڕاگرتنی ئەو "سیاسەتە نابەرپرسانەی" کە ئاسایشی ناوچەکە دەخەنە مەترسییەوە. وەزارەتی دەرەوە ڕایگەیاند کە پێویستە ئێران پابەندی یاسا نێودەوڵەتییەکان بێت و چیتر نەبێتە هۆکاری ناسەقامگیری بۆ وڵاتانی دەوروبەری، چونکە ئەم دۆخە خزمەت بە هیچ لایەنێک ناکات.
سەبارەت بە دۆخی ناوخۆیی و پاراستنی گیانی هاووڵاتییان، وەزارەتی دەرەوەی قەتەر ئاماژەی بەوە کرد کە لە ئێستادا ئاستی هەڕەشە ئەمنییەکان زۆر بەرزە. هەر بۆیە، ڕێنمایی هەموو هاووڵاتییان و دانیشتووانی وڵاتەکەی کرد کە بۆ پاراستنی سەلامەتیی خۆیان لە ماڵەکانیاندا بمێننەوە و پابەندی ڕێکارە ئەمنییەکان بن تا ئەو کاتەی مەترسییەکان دەڕەوێنەوە.