لە سەرەتای جەنگەوە 22 ئیسرائیلی كوژراون و پێنج هەزار كەسیش برینداربوون

پەیام 

ئاماری زیانە گیانی و مادییەكانی قەوارەی زایۆنی لە دەستپێكی جەنگی سەر ئێرانەوە بڵاو كرایەوە و تێیدا جگە لە كوژران هەزاران بریندار و ئاوارەبوون بەدی دەكرێت.

بەپێی داتاكانی پەیمانگای لێكۆڵینەوەی ئاسایشی نیشتمانیی ئیسرائیل كە ڕۆژانە نوێ دەكرێنەوە، ئاماری هێرشەكان بۆ سەر ئیسرائیل گەیشتووەتە 22 كوژراو و زیاتر لە پێنج هەزار بریندار، لە كاتێكدا ئێران لە سەرەتای جەنگەوە زیاتر لە 550 مووشەك و زیاتر لە 765 درۆنی ئاڕاستەی قەوارەكە كردووە.

داتاكان دەریانخستووە كە زیاتر لە 48 هەزار كەس لە ناوخۆی قەوارەكە ئاوارە بوون بەجۆرێك تەلئەبیب بەرزترین ژمارەی ئاوارەبوونی تۆمار كردووە كە هەزار و 515 كەس بووە، دوای ئەو دیمۆنا بە نزیكەی 975 كەس، پاشان عەراد بە 600 كەس، و بئر سبع بە 505 كەس دێن.

هەروەها 650 دانیشتووی بێت شێمێش چۆڵ كراون، 160 لە بنی براك، 80 لە ڕەملە، 75 لە جەفعاتیم، 45 لە ڕامات گان، و 70 لە شارۆچكەی عەرەبی زەرازیر لە باكووری قەوارەكە.

هەمان سەرچاوە ئاماژەی بە ئاوارەبوونی 40 دانیشتووی نیشتەجێبوونی كریات شمۆنە كردووە، 25 لە تەیرەت كارمێل، 20 لە عیمێك حێفەر، سەرەڕای 20 كەس لە حۆڵۆن و 20 كەس لە كفر قاسم، ڕوونیشی كردووەتەوە كە حكومەت لە كاتی پەرەسەندنەكاندا خەڵكەكە لەسەر تێچووی خۆی دەگوازێتەوە بۆ هۆتێلە تایبەتەكان لە ئیلات.
لە هەمان چوارچێوەدا، وەزارەتی تەندروستیی قەوارەی زایۆنی بەرزبوونەوەی ژمارەی بریندارانی لە سەرەتای جەنگەوە بۆ 5492 كەس ڕاگەیاند، لە نێویاندا 261 كەس لە ماوەی 24 كاتژمێری ڕابردوودا بووە، كە 31یان لە دۆخێكی مەترسیداردان.