جوڵەی كەشتیوانی بە گەرووی هورمزدا لەسەدا 97 کەمیکردووە

پەیام

سوپای پاسداران داخستنی گەرووی هورمزی ڕاگەیاند و دەڵێت: هەر هەوڵێكی تێپەڕبوون بە وەڵامێكی توند ڕووبەڕوو دەبێتەوە، ئامارەكانیش دابەزینی 97%ی جوڵەی كەشتیوانی لەو ناوچەیەدا نیشان دەدەن.

لە ڕاگەیەنراوێكدا، سوپای پاسدارانی ئێران بە فەرمی داخستنی گەرووی هورمزی ڕاگەیاند و هۆشداری دا كە هەر هەوڵێكی تێپەڕبوون بە توندی وەڵام دەدرێتەوە. 

سوپای پاسداران ئاماژەی بەوە كرد كە ڕێگری لە هاتووچۆی هەموو ئەو كەشتیانە دەكەن كە بەرەو بەندەرەكانی هاوپەیمانانی ئەمریكا و قەوارەی زایۆنی دەچن، یان لێیانەوە دێن، لەو چوارچێوەیەشدا ئەمڕۆ ڕێگرییان لە سێ كەشتی جیاواز كردووە. 

هەر لەو میانەیەدا سوپای پاسداران قسەكانی دۆناڵد ترەمپی سەرۆكی ئەمریكای دەربارەی بەردەوامیی كراوەیی گەرووەكە بە "درۆ" ناو برد.

لەلایەكی دیكەوە، ڕۆژنامەی "فایننشیاڵ تایمز" لە ڕاپۆرتێكدا ئاشكرای كرد كە جوڵەی كەشتیوانی لە گەرووی هورمزدا تووشی ئیفلیجی بووە. 

بەپێی داتاكان كە ڕۆژنامەكە بڵاوی كردووەتەوە "لە سەرەتای مانگی ئادارەوە تەنها 116 كەشتی لەو ڕێڕەوە تێپەڕیون، ئەمەش دابەزینێكی پێوانەیییە كە دەگاتە 97% بەراورد بە مانگی ڕابردوو". 

ڕۆژنامەكە جەختی كردووەتەوە كە لە سەرەتای هەڵگیرسانی جەنگەوە، هیچ كەشتییەك بەرەو ئەمریكا یان ئەوروپا بەو گەرووەدا تێنەپەڕیوە.

هاوكات سەرچاوە دیبلۆماسییە پاكستانییەكان ڕایانگەیاند: هەندێك لە هێڵە كەشتیوانییە نێودەوڵەتییەكان، ئاڵای كەشتییەكانیان بۆ ئاڵای پاكستان گۆڕیوە تا لە هێرشی هێزەكانی ئێران لە تێپەڕین بە گەرووی هوورموزدا پارێزراو بن.