ترەمپ داوای زیادكردنی بودجەی سەربازی بۆ یەك ترلیۆن و نیو دۆلار دەكات

پەیام

ترەمپ داوای زیادكردنی مێژوویی بودجەی سەربازی بۆ یەك ترلیۆن و نیو دۆلار دەكات و دەیەوێت بە كەمكردنەوەی خەرجییە مەدەنییەكان، باڵادەستیی هێزی دەریایی ئەمریكا لە جیهاندا دووبارە بەدەستبهێنێتەوە. 

ئەمڕۆ هەینی، كۆشكی سپی داواكاریی دۆناڵد ترەمپ، سەرۆكی ئەمریكای بۆ بودجەی ساڵی دارایی 2027 ئاشكرا كرد، كە تێیدا داوای زیادكردنێكی مێژوویی بۆ كەرتی بەرگری كردووە. 

ترەمپ داوای لە كۆنگرێس كردووە بودجەی بەرگری بۆ 1.5  تریلیۆن دۆلار بەرز بكەنەوە، كە ئەمەش بە ڕێژەی 42% لە بودجەی ئەمساڵ زیاترە.

بەپێی بەڵگەنامەكانی كۆشكی سپی، ئەم داواكارییە زیادكردنی زیاتر لە 445 ملیار دۆلار لە خەرجییە سەربازییەكان و كەمكردنەوەی 10%ی خەرجییە مەدەنییەكان (كە دەكاتە 73 ملیار دۆلار) لەخۆدەگرێت. 

یەكێك لە كارە لەپێشینەكانی ئەم بودجەیە، گەڕاندنەوەی باڵادەستیی هێزی دەریایی ئەمریكایە لە ڕێگەی دابینكردنی پارە بۆ بنیادنانی 123 كەشتیی جەنگی نوێ بۆ پنتاگۆن و وەزارەتی ئاسایشی ناوخۆ.

ئەم پێشنیارانە پێویستیان بە ڕەزامەندیی كۆنگرێس هەیە، كە پشتگیریی هەردوو پارتی كۆماری و دیموكراتی دەوێت، و زۆرجار یاسادانەران تەنها وەك پێشنیار مامەڵە لەگەڵ داواكارییەكانی بودجەی سەرۆكدا دەكەن.