سەركردە دیموكراتەكان ترەمپ بە مەترسی بۆ سەر ئەمریكا و جیهان دادەنێن

پەیام

لە ئەمریكا، شەپۆلێك پەرچەكرداری توند دژی وتارەكەی دۆناڵد ترەمپ لەبارەى ئێران سەریهەڵداوە و سەركردە دیموكراتەكان وتارەکە بە "خراپترین شكستە سیاسییەكان" ناوزەد كردووە، پێشیانوایە ترەمپ بووەتە مەترسی بۆ سەر ئەمریكا و جیهان.  

چاك شوومەر، سەرۆكی دیموكراتەكان لە ئەنجومەنی پیران، ڕایگەیاند: هەڵسوكەوتەكانی ترەمپ یەكێكە لە گەورەترین هەڵەكان لە مێژووی وڵاتدا، ئاماژەی بەوەش كرد، وتارەكانی دۆناڵد ترەمپ ناڕوونن و ئامانجی دیاریكراویان نییە.

هەروەها سیناتۆر كریس ڤان هۆلن،  هۆشداریی دا، ترەمپ مەترسییە بۆ سەر ئەمریكا و جیهان و تۆمەتباری كرد بە چەواشەكردنی ڕای گشتی. 

لەلایەكی دیكەوە، حەكیم جێفریز سەركردەی دیموكراتەكان لە كۆنگرێس داوای كۆتاییهێنانی بە "جەنگی سەرشێتانە" لە ڕۆژهەڵاتی ناوەڕاست كرد.

سیناتۆر ئەندی كیم جەنگەكەی بە "كارەسات" ناوزەد كرد و هۆشداری لە ناردنی هێزی زەمینی بۆ ئێران دا. 

هاوكات كریس مۆرفی و كریس كۆنزی دیموكرات نیگەرانیی خۆیان دەربڕی و جەختیان كردەوە، ئیدارەی ئێستا ستراتیژێكی ڕوونی بۆ كۆتاییهێنان بەم تەنگژەیە نییە و بەرەو دۆخێكی نادیار هەنگاو دەنێن.