پێنتاگۆن: لە جەنگی ئێران 13 سەربازی ئەمریكی كوژراون و 365ی دیكە برینداربوون

پەیام

وەزارەتی بەرگری ئەمریكا نوێترین ئاماری سەربازە كوژراو و بریندارەكانی جەنگی ئێرانی ڕاگەیاند. 

بەپێی ڕاگەیانراوێكی وەزارەتی بەرگری ئەمریكا (پێنتاگۆن) لە سەرەتای دەستپێكردنی هێرشە سەربازییەكانی ئەمریكا و قەوارەی زایۆنی بۆ سەر ئێران لە ڕۆژی 28ی مانگی شوباتەوە تائێستا 13 سەربازی ئەمریكی كوژراون و 365 سەربازی دیكە بریندار بوون كە 80یان ئەفسەرن.

پێنتاگۆن باس لەوە دەكات شەش لەو سەربازە ئەمریكییانەی لە جەنگی ئێران كوژراون لە هێزی زەمینی خزمەتیان كردووە و حەوتیشیان لە هێزی ئاسمانی بوون.

بەپێی ڕاگەیانراوەكەی وەزارەتی بەرگری ئەمریكا، سەربازە بریندارەكانی جەنگی سەر ئێرانیش 247یان لە هێزی زەمینین و 63 بریندار لە هێزی دەریایین، هەروەها 19 برینداریش لە هێزی پیادەی دەریایی و 36 بریندار لە هێزی ئاسمانیین.

هەر لەوبارەوە، (دان كین) سەرۆكی دەستەی ئەركانی هاوبەشی ئەمریكی ڕایگەیاند كە زۆرینەی حاڵەتەكانی برینداریی هێزەكانی ئەمریكا لە ئاكامی هێرشی فڕۆكەی بێفڕۆكەوانی ئێرانەوە دروست بووە.