پێش 2 هەفتە
303 جار خوێنراوەتەوە
هەناردەی غازی ئێران بۆ ناوچەكانی باشوورى عێراق بە تەواوی ڕاگیرا
پەیام
وەزارەتی كارەبای عێراق ڕایگەیاند، هەناردەی غازی ئێران بۆ ناوچەكانی باشوور بە تەواوی وەستاوە و ئەوەی هەیە تەنیا بەشی نێوەڕاستی وڵات دەكات.
ئەحمەد موسا، وتەبێژی وەزارەتی كارەبای عێراق ڕایگەیاند: لە دوای ڕاگرتنی تەواوی هەناردەی غازی ئێران بۆ ناوچەكانی باشووری وڵات، هەوڵ دەدەین لە ڕێگەی بەكارهێنانی گازوایلەوە وەك سووتەمەنی جێگرەوە، ژمارەیەك لەو وێستگانە بەگەڕ بخەینەوە كە بەهۆی كەمی گازەوە لە كار كەوتوون.
وتیشی: هەرنادەی غاز بۆ ناوچەكانی ناوەڕاستیش بۆ پێنج ملیۆن مەتر سێجا دابەزیوە.
موسا ڕایشیگەیاند: دابەزینی بەرهەمهێنان و هەناردەكردنی نەوت بووەتە هۆی كەمبوونەوەی غازی ناوخۆیی لە 1100 ملیۆن پێ سێجاوە بۆ 400 ملیۆن پێ سێجا، ئەوەش كاریگەری لەسەر ژمارەیەك لە وێستگەكان هەبووە.
وتەبێژی وەزارەتی كارەبای عێراق ئاماژەی بەوەش دا، كە وەزارەت بە هەماهەنگی لەگەڵ وەزارەتی نەوت كار بۆ دابینكردنی سووتەمەنی لە ڕێگەی تەنكەرەكانەوە بۆ پاراستنی ئاستی بەرهەمهێنانی وزە لەم دۆخە سەختەدا، دەكات.
بەپێی قسەی وتەبێژی وەزارەتی كارەبای عێراق بێت پڕۆژەكانی بەستنەوەی كارەبا لەگەڵ وڵاتانی دراوسێ و سەكۆی خۆر ئەلزوبەیر پێش وەرزی هاوین تەواو دەبن و تۆڕەكانی گواستنەوە و دابەشكردنیش بۆ ڕووبەڕووبوونەوەی لووتكەی بەكارهێنان لە وەرزی گەرما و باشتركردنی دۆخی كارەبا ئامادەن.
لە تۆڕە کۆمەڵایەتیەکان شەیری بکە