ئێران بۆ تڕەمپ: هەر هەڵەیەك لە گەرووى هورمز دەبێتە هۆی تیاچوونی هێزەكانتان

پەیام

هێزی دەریایی سوپای پاسدارانی ئێران لە وەڵامێكی تونددا بۆ هەڕەشەكانی دۆناڵد ترەمپ ڕایگەیاند، گەرووی هورمز لە ژێر كۆنتڕۆڵی تەواویاندایە و هەر هەڵەیەكی سەربازیی، دەبێتە هۆی تیاچوونی هێزەكانی ئەمریكا.

فەرماندەیی هێزی دەریایی سوپای پاسدارانی ئێران، لە ڕێگەی بڵاوكردنەوەی گرتەیەكی ڤیدیۆیی كە لە لایەن فڕۆكەی بێفڕۆكەوانەوە تۆمار كراوە، دیمەنی ئێستای گەرووی هورمزی پیشان دا و جەختی كردەوە، سەرجەم هاتوچۆكان لە ژێر چاودێریی وردی هێزەكانیاندایە. 

ئەم هەڵوێستە وەك وەڵامێكی ڕاستەوخۆ دێت بۆ لێدوانەكانی ترەمپ سەبارەت بە گەمارۆدانی گەرووەكە؛ سوپای پاسداران ڕایگەیاند كە ئەوان بڕیاردەری سەرەكین لەو ڕێڕەوە ستراتیژییەدا و ڕێگە بە هیچ دەستوەردانێكی بیانی نادەن.

لە بەیاننامەیەكدا كە ئاژانسی "فارس" بڵاوی كردووەتەوە، هێزی دەریایی سوپای پاسداران هۆشدارییەكی توندی داوە و ڕایگەیاندووە: "هەر هەنگاوێكی هەڵە، دوژمن لە ناو گەرووی هورمزدا دەخاتە ناو گەردەلوول و دۆخێكی كوشندەوە".

تاران جەخت دەكاتەوە، هێزە چەكدارەكانیان لەوپەڕی ئامادەییدان بۆ بەرپەرچدانەوەی هەر هەوڵێكی هێزی دەریایی ئەمریكا بۆ گرتنی كەشتییەكان و ڕایانگەیاندووە، ناوچەكە دەكەنە گۆڕستان بۆ هەر هێزێكی دەستدرێژكار كە بییەوێت سەروەریی ئێران لەو سنوورەدا ببەزێنێت.