چوارچێوەی هەماهەنگی تاوتوێى ناوێکى نوێ بۆ سەرۆكوەزیرانى عێراق دەکات

پەیام

سەرچاوەیەك لە ناو چوارچێوەی هەماهەنگی ڕایگەیاند، هاوپەیمانییەكەیان سەرقاڵی تاوتوێكردنی لیستی ناوی 9 كاندیدە بۆ پۆستی سەرۆكوەزیرانی داهاتووی عێراق و بڕیارە سبەی لە كۆبوونەوەیەكدا یەكلا بكرێنەوە.

عامر فایز، سەرۆكی هاوپەیمانیی "تەسمیم" ئاشكرای كرد كە سبەینێ چوارچێوەی هەماهەنگی كۆ دەبێتەوە، ناوی 9 كەس لە بەردەستدایە بۆ ئەوەی یەكێكیان بكرێتە كاندید بۆ وەرگرتنی پۆستی سەركوەزیران، كە بریتین لە (نوری مالیكی، محەمەد شیاع سودانی، حەیدەر عەبادی، باسم بەدری، موحسین مەندەلاوی، حەمید شەتری، محەمەد ساحیب دەڕاجی، عەلی شوكری و قاسم ئەعرەجی). 

بڕیارە كۆبوونەوەی یەكلاكەرەوە لە ماڵی عەممار حەكیم بەڕێوە بچێت بۆ دیاریكردنی میكانیزمی هەڵبژاردنی گونجاوترین كەس، ئەمەش لە كاتێكدایە كە نوری مالیكی هێشتا وەك كاندیدی سەرەكی دەردەكەوێت، بەڵام بەهۆی ڤیتۆی ئەمریكا، چوارچێوەی هەماهەنگی دەیەوێت بیگۆڕێت.

هاوكات ئەبو میساق مەساری، ئەندامی چوارچێوەكە جەختی كردەوە كە تا ئێستا مالیكی تەنها كاندیدی فەرمییە كە دەنگی زۆرینەی هاوپەیمانییەكەی هەیە و هەر گۆڕانكارییەك پێویستی بە كشانەوەی فەرمیی ناوبراو دەبێت.