17/04/2026
297 جار خوێنراوەتەوە
پاش توركمان پۆستی پارێزگاری كەركووك دەدرێتە عەرەب
پەیام
ئەمینداری گشتیی بزووتنەوەی عەسائیبی ئەهلی حەق، ڕایگەیاند: هەڵبژاردنی پارێزگارێكی توركمان بەرهەمی ڕێككەوتنی لایەنەكانە و لە داهاتووشدا بۆ چەسپاندنی هاوسەنگی و هاوبەشی پۆستی پارێزگاری كەركووك دەدرێتە پێكهاتەی عەرەب.
قەیس خەزعەلی، ئەمینداری گشتیی بزووتنەوەی عەسائیبی ئەهلی حەق، ئاشكرای كرد "دەستبەكاربوونی محەممەد سەمعان وەك پارێزگاری نوێی كەركووك لە پشكی توركمان، بەرهەمی ئەو ڕێككەوتنە سیاسییەیە كە لە ساڵی 2024 لە نێوان یەكێتیی نیشتمانیی كوردستان و حزبی تەقەددوم واژوو كراوە، كە حكومەتی خۆجێی لێ كەوتووەتەوە".
خەزعەلی ئاماژەی بەوەش كرد "ڕێككەوتنەكە ئامانجی كۆتاییهێنان بووە بە بنبەستی سیاسی لە شارەكەدا"، وتیشی: بە پێی بنەمای دەستاودەستكردنی دەسەڵات، لە قۆناغی داهاتوودا پۆستی پارێزگار لە پێكهاتەی توركمانەوە بۆ پێكهاتەی عەرەب دەگوازرێتەوە.
خەزعەلی داواشی لە ئیدارەی نوێی شارەكە كرد بە جددی كار بۆ چەسپاندنی ئاسایش و خزمەتگوزاری و ئاوەدانكردنەوە بكەن بە جۆرێك كە لە ئاست چاوەڕوانیی هەموو پێكهاتەكانی كەركووكدا بێت.
لە تۆڕە کۆمەڵایەتیەکان شەیری بکە