05/06/2026
266 جار خوێنراوەتەوە
شاندی ئیمراڵی و ئاكپارتی پڕۆژەیاسای گەڕانەوەی پـ.ەكەكەیان تاوتوێ كرد
پەیام
شاندی ئیمراڵی دەم پارتی لەگەڵ فراكسیۆنی ئاكپارتی كۆ بوونەوە بۆ تاوتوێكردنی "یاسای چوارچێوە" كە مۆڵەتی گەڕانەوە دەداتە ئەندامانی پەكەكە و پڕۆسەی ئاشتی خێرا دەكات.
ئەمڕۆ هەینی، شاندی ئیمراڵیی پارتی یەكسانی و دیموكراسیی گەلان (دەم پارتی)، كە لە پەروین بوڵدان و میتحات سانجار پێكهاتبوون، لە پەرلەمانی توركیا لەگەڵ فراكسیۆنی پارتی داد و گەشەپێدان (ئاكپارتی) كۆبوونەوە.
تەوەری سەرەكیی كۆبوونەوەكە تاوتوێكردنی ڕەشنووسی "یاسای چوارچێوە" یان "یاسای ڕەگ وڕیشە" بوو كە وەك هەوڵێكی نوێ بۆ چارەسەری پرسی كورد لە توركیا دەبینرێت.
بەپێی زانیارییەكان، ئەم ڕەشنووسە لە 7 بۆ 8 خاڵ پێكهاتووە و پێشتر لە دیداری دوورگەی ئیمراڵیدا لەگەڵ عەبدوڵڵا ئۆجەلان گفتوگۆی لەسەر كراوە.
پەروین بوڵدان ڕایگەیاندووە كە ئۆجەلان ئەم یاسایە بە بنەڕەتی دەزانێت بۆ خێراكردنی پڕۆسەی دیموكراسی.
ناوەرۆكی یاساكە ڕێگە بە ئەندامانی پەكەكە دەدات لە ماوەیەكی دیاریكراودا سوودمەند بن و بگەڕێنەوە بۆ توركیا یان بچنە هەر وڵاتێكی دیكە كە خۆیان دەیانەوێت.
ئەم دانوستانانە وەك هەوڵێكی جدیی پەرلەمانی دادەنرێن بۆ دروستكردنی بنەمایەكی یاسایی بۆ قۆناغێكی نوێی ئاشتی.
لە تۆڕە کۆمەڵایەتیەکان شەیری بکە