تۆم باراك: پەیوەندییەكانی ئەمریكا و توركیا لە لوتكەدایە و لە سووریاش كشاوینەتەوە

پەیام 

باڵیۆزی ئەمریكا لە توركیا و نێردەی تایبەتی سەرۆكی ئەمریكا بۆ كاروباری سووریا ڕایگەیاند: پەیوەندییەكانی ئەمریكا و توركیا لە باشترین ئاستدایە، هەروەها كشاندنەوەی هێزەكانی واشنتن لە سووریا زەمینەخۆشكەر دەبێت بۆ سەقامگیرییەكی بێوێنە لە ناوچەكەدا.

تۆم باراك، باڵیۆزی ئەمریكا لە توركیا و نێردەی تایبەتی سەرۆكی ئەمریكا بۆ كاروباری سووریا، لە پەراوێزی كۆڕبەندی دیپلۆماسیی ئەنتاڵیا جەختی لەوە كردەوە، كە پەیوەندییەكانی واشنتن و ئەنقەرە قۆناغێكی مێژوویی زێڕین بەڕێ دەكەن. ئاماژەی بەوەش كرد، بەم زووانە گەڕێكی نوێی دانوستانەكان سەبارەت بە فڕۆكەی (F-16) دەست پێ دەكاتەوە و توركیا وەك هاوپەیمانێكی ستراتیژیی گرنگی ناتۆ دەمێنێتەوە.

سەبارەت بە پەیوەندییەكانی توركیا و ئیسرائیل، باراك وتی: هەردوولا "لە نێو یەك سەنگەردان" و پەیوەندییەكەیانی چواند بەو ڕێككەوتنانەی لە نێوان ئیسرائیل و ئیماراتدا هەیە. 

باسی لەوەش كرد، ئەو گرژییانەی لە میدیاكاندا دەردەكەون زیاتر لایەنی پڕوپاگەندەیان هەیە، بەڵام لە واقیعدا هاوكارییەكان بەردەوامن.

نێردەی تایبەتی ئەمریكا ئاشكرای كرد، دواین سەربازی وڵاتەكەی لە چەند ڕۆژی ڕابردوودا لەو بنكانە كشاوەتەوە كە بۆ شەڕی داعش تەرخان كرابوون. 

باراك پێشبینی كرد كە سووریا و ناوچەكە بەرەو سەقامگیرییەك هەنگاو بنێن كە لە 50 ساڵی ڕابردوودا وێنەی نەبووبێت، ڕاشیگەیاند، واشنتن لەگەڵ وڵاتانی ناوچەكە كار دەكات بۆ خوڵقاندنی دەرفەتی نوێی ئاشتی لە سووریا.