هەشت وڵاتی ئیسلامی ڕاگەیەنراوێکیان لەسەر مزگەوتى ئەقسا بڵاو کردەوە

پەیام

هەشت وڵاتی ئیسلامی و عەرەبی لە بەیاننامەیەکی هاوبەشدا، بەتوندی ئیدانەی هەڵکوتانە سەر مزگەوتی ئەقسا و بەرزکردنەوەی ئاڵای ئیسرائیل لەلایەن دانیشتووانە جولەکەکانەوە دەکەن و بە پێشێلکارییەکی زەقی یاسا نێودەوڵەتییەکانی دەزانن. 
ئاژانسی فەرمیی هەواڵی سعودیە، دەقی بەیاننامە هاوبەشەکەی بڵاوکردووەتەوە کە لەلایەن وەزیرانی دەرەوەی هەریەک لە (سعودیە، ئوردن، ئیمارات، قەتەر، ئیندۆنیزیا، پاکستان، میسر و تورکیا) وە دەرچووە. بەیاننامەکە بە توندترین شێوە سەرکۆنەی بەردەوامیی چوونەژوورەوەی توندڕەوە جولەکەکان بۆ نێو حەرەمی مزگەوتى ئەقسا دەکات. هاوکات بەرزکردنەوەی ئاڵای ئیسرائیل لە گۆڕەپانی مزگەوتەکەدا بە کارێکی ئیستفزازی و پێشێلکارییەکی ڕوونی بڕیارەکانی نەتەوە یەکگرتووەکان و دۆخی مێژوویی قودس وەسف دەکات. 
وەزیرانی دەرەوەی ئەو وڵاتانە، ڕەت کردنەوەی خۆیان بۆ هەر هەوڵێک دەربڕی کە ئامانج لێی گۆڕینی دۆخی مێژوویی، یاسایی و دیمۆگرافیی قودسی ڕۆژهەڵات بێت، بەتایبەتی ئەو هەنگاوە نایاساییانەی کە پیرۆزیی شوێنە ئیسلامی و مەسیحییەکان پێشێل دەکەن. 
لە کۆتاییدا، وڵاتانی بەشداربوو پشتیوانیی نەگۆڕی خۆیان بۆ گەلی فەلەستین و مافە ڕەواکانیان دووپاتی کردەوە، لە سەروویانەوە مافی دیاریکردنی چارەنووس و دامەزراندنی دەوڵەتێکی سەربەخۆ لەسەر سنوورەکانی ساڵی ١٩٦٧ بە پایتەختیی قودسی ڕۆژهەڵاتەوە، هەروەها پشتیوانییان بۆ چارەسەری دوو دەوڵەت و دەستپێشخەریی ئاشتیی عەرەبی بەپێی یاسا نێودەوڵەتییەکان ڕاگەیاند.