سەدر فەرمانی کرد فەرماندەکانی سەرایا سەلام لە کەربەلا بگۆڕدرێن

پەیام
موقتەدا سەدر، سەرکردەی ڕەوتی نیشتمانیی شیعە، فەرمانی کرد بە کشاندنەوەی سەرجەم چەکەکان و گۆڕینی فەرماندە سەربازییەکانی سەرایا سەلام لە پارێزگای کەربەلا، ئەوەش دوای ئەو شەڕ و پێکدادانە چەکدارییەی کە شەوی ڕابردووی لە شارەکە ڕووی دا. 
شەوی ڕابردوو شەڕ و پێکدادان لە نێوان چەکدارانی سەرایا سەلام و گرووپێکی جیابووەوە لە سەرایا سەلام، بە ناوی (ئەزھەرییەکان) لە ناوچەی حوور ناوەڕاستی کەربەلا ڕووی دا کە بەھۆیەوە کەسێک کوژراوە و یەکێکی دیکەش بریندار بوو. 
موقتەدا سەدر لەبارەی ڕووداوەکەی شەوی ڕابردوو کەربەلا ڕاگەیاندراوێکی بڵاوکردەوە و تیایدا فەرمانی کردووە کە لە ماوەی پێنج ڕۆژدا، سەرجەم ئەو چەکانەی لە دەستی یەکە سەربازییەکاندا لە شاری کەربەلا کۆبکرێنەوە و بکشێندرێنەوە. 
ھەروەھا سەرکردەی ڕەوتی نیشتمانی شیعە ڕاشیگەیاندووە: "پێویستە لە ماوەی مانگێکدا ھێزەکانی (سەرایا سەلام) لە کەربەلا سەرلەنوێ رێکبخرێنەوە و سەرجەم فەرماندەکانی ئەو پارێزگایە بگۆڕدرێن. 
ھەر لە ڕاگەیاندراوەکەدا، موقتەدا سەدر فەرمانی کردووە، دەستبەسەر سەرجەم ئەو ئۆتۆمبێلانەدا بگیدرێت کە لەلایەن ئەو کەسانەوە بەکارھێنراون کە لە ڕووداوەکەی شەوی ڕابردوو، تێوەگلاون. 
موقتەدا سەدر، سەرکردەی ڕەوتی نیشتمانیی شیعە، لە بەشێکی دیکەی ڕاگەیاندراوەکەدا، بە توندی ھێرشی کردووەتە سەر ئەو کەسانەی کە لە ڕووداوەکەدا تێوەگلاون و ئاماژەی بەوەداوە: " من تاوەکو ڕۆژی دوایی بەریی بوونی خۆم لەو کەسانە رادەگەیێنم کە لە ڕووداوەکەدا تێوەگلاون، ئەوان تێرۆریست و دووژمنی ئیمام حوسێنن. "
ھەروەھا موقتەدا سەدر داوای کردووە لیستێک لە ناوی ئەو کەسانە ئامادە بکرێت بۆ ئەوەی ڕادەستی لایەنە پەیوەندیدارەکان بکرێن و سزای تووندیان بەسەردا بسەپێنرێت، کە رەنگە بگاتە لەسێدارەدان.