2 کاتژمێر پێش ئێستا
142 جار خوێنراوەتەوە
مەزڵوم عەبدی لەگەڵ باڵیۆزی توركیا لە سووریا كۆبووەتەوە
پەیام
مەزڵوم عەبدی فەرماندەی گشتیی هێزەكانی سووریای دیموكرات (هەسەدە) لە دیمەشق لەگەڵ نوح یەڵماز باڵیۆزی توركیا كۆ بووەوە و بەڵێنی ئەوەشی پێ درا كە لە ئایندەیەكی نزیكدا لە ئەنقەرە پێشوازی لێ بكرێت.
لە پێشهاتێكی گرنگدا، سەرچاوە نزیكەكان لە حكومەتی سووریا ئاشكرایان كرد، كە مەزڵوم عەبدی فەرماندەی هەسەدە لە چوارچێوەی سەردانەكەی هەفتەی ڕابردووی بۆ دیمەشقی پایتەخت لەگەڵ نوح یەڵماز باڵیۆزی توركیا كۆ بووەتەوە. بەبێ ئەوەی ئاماژە بەوە بكرێت ئەسعەد شیبانی وەزیری دەرەوەی سووریا لە كۆبوونەوەكەدا ئامادە بووە، یان نا؟
تەوەرە سەرەكییەكانی گفتوگۆی نێوان عەبدی و باڵیۆزی توركیا بریتی بوون لە پڕۆسەی ئاشتیی نێوان ئەنقەرە و عەبدوڵڵا ئۆجەلان و كاریگەرییەكانی لەسەر كوردی سووریا، بەتایبەت پرسی چوونە دەرەوەی كادرە پێشووەكانی پارتی كرێكارانی كوردستان (پەكەكە) لە خاكی سووریا وەك ئامادەكارییەك بۆ ڕێككەوتنی سیاسی و ئەمنیی گشتگیر لە ناوچەكەدا.
لە كۆبونەوەكەدا باڵیۆزی توركیا جەختی لەسەر پێویستیی خێراكردنی پڕۆسەی تێكەڵكردنی هێزەكانی هەسەدە لە ناو دامەزراوە فەرمییەكانی دەوڵەتی سووریادا كردووەتەوە.
سەرەڕای ئەوەی عەبدی لە لیستی داواكراوەكانی توركیادایە، بەڵام باڵیۆزی توركیا ئاماژەی بە ئەگەری پێشوازیكردنی لە ئەنقەرە كردووە، ئەوەش وەك وەرچەرخانێكی گەورە لە هەڵوێستی توركیا دەبینرێت، كە بۆ ماوەی زیاتر لە 10 ساڵ بە درێژكراوەی پەكەكە تۆمەتباری دەكردن.
ئەمەو تا ئێستا هەسەدە بە فەرمی لێدوانی لەسەر ئەم كۆبوونەوە چاوەڕواننەكراوە نەداوە.
لە تۆڕە کۆمەڵایەتیەکان شەیری بکە