1 کاتژمێر پێش ئێستا
80 جار خوێنراوەتەوە
دهست بهسهر 50 بهلهمی كهشتیگهلی خۆڕاگریدا گیرا
هێزی دەریاییی ئیسرائیل دەست بەسەر ٥٠ بەلەم و ٤٠٠ چالاکوانی "کەشتیگەلی خۆڕاگری" دا دەگرێت کە بە نیازبوون گەمارۆی سەر غەززە بشکێنن و بە زۆر ئاراستەی گەشتەکەیان بەرەو بەندەری ئەشدۆد دەگۆڕدرێت.
هێزەکانی سوپای ئیسرائیل لە نزیک هەردوو دوورگەی کریت و سیسیلی لە دەریای ناوەڕاست، هەڵیانکوتاوەتە سەر "کەشتیگەلی خۆڕاگری" کە لە ٥٨ بەلەم و ٤٠٤ چالاکوان پێکهاتووە. بەپێی زانیارییەکانی کەناڵی ١٢ی ئیسرائیلی، سەربازان بە چەکی ئاراستەکراوەوە چوونەتە سەر بەلەمەکان و داوایان لە چالاکوانان کردووە بزوێنەرەکان بکوژێننەوە و لە پێشەوەی بەلەمەکان بە چۆکدا بێن، هاوکات دەستبەجێ دەستگیرکردنی سەرجەم بەشداربووەکانیان راگەیاندووە.
چالاکوانانی ناو کەشتیگەلەکە ئاماژەیان بەوە کردووە کە سوپای ئیسرائیل لە ڕێگەی تێکدانی سیستمی جی پی ئێس و ئامێرەکانی پەیوەندییەوە، هەوڵی پەکخستنی گەشتەکەیانی داوە. نوێنەری سوپای ئیسرائیلیش لە ڕێگەی بێتەلەوە ئاگاداری کردوونەتەوە کە هەر هەوڵێک بۆ گەیشتن بە غەززە بە نایاسایی دادەنرێت و ڕووبەڕووی سزای یاسایی دەبنەوە، لە بەرانبەریشدا پێشنیازی بۆ کردوون کە هاوکارییە مرۆییەکان ڕادەستی بەندەری ئەشدۆد بکەن.
ئەم کەشتیگەلە کە لە شاری بەرشەلۆنەی ئیسپانیاوە بەڕێکەوتبوو، ئامانجی سەرەکی گەیاندنی هاوکاری و شکاندنی گەمارۆی سەر کەرتی غەززە بوو. تاوەکو ئێستا سوپای ئیسرائیل بە فەرمی هیچ ڕاگەیەندراوێکی دەربارەی وردەکاریی ئەو ئۆپەراسیۆنە و چارەنووسی دەستگیرکراوەکان بڵاونەکردووەتەوە.
لە تۆڕە کۆمەڵایەتیەکان شەیری بکە