ئۆپیك ده‌یه‌وێت به‌رهه‌مهێنان زیاد بكات له‌كاتێكدا هێشتا نه‌وتی كۆگاكان هه‌نارده‌ ده‌كرێت

په‌یام

هاوپەیمانیی ئۆپێک پڵاس لە کۆبوونەوەیەکی ئۆنلایندا بڕیار لەسەر زیادکردنی پشکی بەرهەمهێنانی نەوت بۆ مانگی ئاب دەدات، کە بەپێی پێشبینیی شرۆڤەکارانی ئابووری، زیادکردنەکە دەگاتە ‎١٨٨‎ هەزار بەرمیل لە ڕۆژێکدا و كاریگه‌رییشی له‌سه‌ر نرخی نه‌وت له‌ بازاڕه‌كاندا ده‌بێت.

چاوەڕوان دەکرێت هاوپەیمانییەکە بە هەمان خێرایی مانگەکانی ڕابردوو بەرهەمهێنان زیاد بکات، کە بەپێی پێشبینیی شرۆڤەکارانی ئابووری، زیادکردنەکە دەگاتە ‎١٨٨‎ هەزار بەرمیل لە ڕۆژێکدا، هەرچەندە تا ئێستا ئاستی بەرهەمهێنان لە خوار ئامانجە دیاریکراوەکانەوەیە.
پێشتر بەهۆی داخرانی گەرووی هورمز لەلایەن ئێرانەوە لە کاتی جەنگەکەدا، وڵاتانی کەنداو ناچار بوون بەرهەمهێنان کەم بکەنەوە و هەناردەی نەوت بۆ چەندین مانگ ڕابگیرێت. بەپێی داتاکانی ئۆپێک، لە نێوان چارەکی یەکەمی ساڵی ‎٢٠٢٦‎ بۆ مانگی ئایار، کۆی بەرهەمهێنانی عەرەبستانی سعوودی، عێراق و کوەیت بە بڕی نزیکەی شەش ملیۆن بەرمیل لە ڕۆژێکدا کەمی کردووە. 

دوای ئەوەی لە ‎١٧‎ی حوزەیراندا تاران و واشنتن یاداشتێکی لێکتێگەیشتنیان بۆ لابردنی ئاستەنگەکانی بەردەم کەشتیوانی لە گەرووی هورمز واژۆ کرد، جووڵەی دەریایی بەرەو بووژانەوە دەچێت و نرخی نەوتیش بۆ ئاستی پێش جەنگەکە دابەزیوە. لە کاتێکدا ڕاپۆرتەکان ئاماژە بە تێپەڕبوونی ڕۆژانەی زیاتر لە دە ملیۆن بەرمیل نەوت دەکەن لەو ڕێڕەوەدا، بەڵام شارەزایان هۆشداری دەدەن کە ئەو نەوتە لە ڕاستیدا لە کۆگاکاندایە و دەستپێکردنەوەی بەرهەمهێنانی ڕاگیراو کاتی دەوێت، بۆیە پێشبینی دەکرێت بووژانەوەی ڕاستەقینەی خستنەڕوو لە مانگی تەممووزدا دەست پێبکات و لە مانگی ئابدا خێراتر ببێت. 

لەگەڵ پێشبینییەکانی بوونی زیادەی نەوت لە بازاڕەکانی ساڵی داهاتوودا، ئەرکی ئۆپێک پڵاس کە بەهۆی کشانەوەی ئیمارات لە مانگی ئایاردا لاواز بووە، لە کۆنترۆڵکردنی دابەزینی نرخەکاندا قورستر دەبێت. لەم نێوەندەدا، عێراق بە فەرمی داوای زیادکردنی پشکی خۆی کردووە بۆ قەرەبووکردنەوەی زیانەکانی کاتی جەنگ، بەڵام بە بڕوای شارەزایان ئەم داوایە هەنووکەیی نییە بەو پێیەی هێشتا ئاستی بەرهەمهێنانی ئەو وڵاتە نەگەیشتووەتەوە دۆخی پێش جەنگ. بڕیارە لە کۆتایی ئەم ساڵدا، هاوپەیمانییەکە بەپێی توانای بەرهەمهێنانی وڵاتە سەرەکییەکان کە پێکهاتوون لە سعوودیە، ڕووسیا، عێراق، کوەیت، کازاخستان، جەزائیر و عومان، پێداچوونەوەیەکی گشتگیر بە پشکی ئەندامەکانیدا بکات.