ئیسپانیا: هێشتا هه‌زاران كۆچبه‌ری مه‌غربی له‌ شاری سه‌بته‌ ماونه‌ته‌وه‌

په‌یام

بەرپرسانی شاری سبتە ڕایانگەیاند کە سەرەڕای گەڕانەوەی ٦٩ هەزار کۆچبەر بۆ مەغریب، هێشتا نزیکەی پێنج هەزار کەسی دیکە لە شارەکەدا ماونەتەوە. 
خوان خیسوس ڤیڤاس حاکمی سبتە ئاشکرای کرد کە زیاتر لە ٦٩ هەزار کۆچبەر گەڕاونەتەوە بۆ وڵاتی مەغریب، بەڵام سێ هەزار بۆ پێنج هەزار کۆچبەری دیکە هێشتا لە ناو شارەکەدان و فشارێکی زۆریان خستووەتە سەر ناوەندەکانی پێشوازیکردن. 
هاوکات ئالبێرتۆ گایتان ڕاوێژکاری سەرۆکایەتی لە سبتە ڕایگەیاند، کە شارەکە ئێستا میوانداریی ٨٦٢ منداڵی کۆچبەر دەکات، کە ئەم ژمارەیە بە ڕێژەی ٢٨٧٢٪ لە توانای ئاسایی شارەکە زیاترە، ئەو هەواڵەنەشی ڕەت کردەوە کە پێشتر زانیاریی هەواڵگرییان لەسەر شەپۆلی کۆچی بەکۆمەڵ پێگەیشتبێت. 
بەپێی یاساکانی ئیسپانیا، پێویستە منداڵە کۆچبەرە بێسەرپەرشتەکان لە ژێر چاودێریی دامەزراوە گشتییەکاندا بن، بەڵام توانای ئاسایی سبتە تەنها بۆ ٢٩ منداڵ دیاریکراوە، کە ئەمەش ئاستەننگێکی گەورەی مرۆیی دروست کردووە. دەسەڵاتدارانی شارەکە سەرقاڵی ئامادەکردنی دوو ناوەندی دیکەن بۆ نیشتەجێکردنی ئەو منداڵانە تاوەکو ڕێگری لە هەر قەیرانێکی تەندروستی و کۆمەڵایەتی بکەن. 
لایەنە پەیوەندیدارەکان هەوڵ دەدەن لە ڕێگەی ڕێکخستنەوەی ناوەندەکان و ئاڕاستە کردنی هاوکارییەکان، کۆنترۆڵی بارودۆخەکە بکەن و ئارامی بۆ شارەکە بگەڕێننەوە.