پزیشكیان: ئێران ئامانجی ئه‌وه‌ی نیه‌ بازنه‌ی شه‌ڕ فراوانتر بكات

په‌یام

مەسعود پزیشکیان، سەرۆككۆماری ئێران ڕایگەیاند وڵاتەکەی بەرگری لە سنوورەکانی دەکات، بەڵام نایەوێت بازنەی شەڕ فراوانتر بکات. 
بەپێی ئەو هەواڵانەی لە میدیا فەرمییەکانی ئێرانەوە بڵاوکراونەتەوە، پزیشکیان رایگەیاندووە، تاران مافی خۆیەتی بەرگری لە خاک و سنوورەکانی بکات، بەڵام لە هەمان کاتدا هیچ ئامانجێکی بۆ هەڵگیرساندنی شەڕێکی بەرفراوانتر نییە. سەرۆككۆماری ئێران ئاماژەی بەوەشکردووە کە لەم بارودۆخە هەستیارەی ئێستادا، پێویستە وڵاتەکەی کۆمەڵگەیەک بنیات بنێت کە دوژمنان نەتوانن چاوی تێببڕن و دزەی تێدا بکەن، یان پێکهاتە کۆمەڵایەتییەکەی هەڵبوەشێننەوە. 
لێدوانەکانی سەرۆككۆماری ئێران دوای ئەوە دێن کە دۆناڵد ترەمپ، سەرۆکی ویلایەتە یەکگرتووەکانی ئەمریکا ڕۆژی دووشەممە ڕایگەیاند گفتوگۆ لە نێوان واشنتن و تاراندا هەیە. لە بەرانبەردا، بەرپرسانی ئێران بە توندی ئەو بانگەشانەیان ڕەت کردەوە و جەختیان لەوە کردەوە کە هیچ پلان و بەرنامەیەک بۆ ئەنجامدانی دانوستان لە ئارادا نییە.