ترەمپ: دانوستانەکان لەگەڵ ئێران ڕاگیران و گەمارۆی دەریایی بەردەوامە

پەیام
دۆناڵد ترەمپ، سەرۆکی ئەمریکا، فەرمانی بە دیبلۆماتکارانی وڵاتەکەی داوە دانوستانەکان لەگەڵ ئێران بوەستێنن. 
بەپێی زانیارییەکانی تۆڕی "سی ئێن ئێن"، دوای چەندین هەفتە لە هەوڵدان بۆ گەیشتن بە ڕێکەوتن، ترەمپ بڕیاری داوە شێوازێکی نوێ بگرێتەبەر و کۆتایی بە دانوستانەکان بهێنێت. ئەم هەنگاوە دوای ئەوە دێت کە ناوبراو ڕۆژی سێشەممە ڕایگەیاند هیچ گفتوگۆیەک لەگەڵ تاران لە ئارادا نییە، هەرچەندە پێشتر باسی لە هەبوونی کەناڵێکی پەیوەندیی شاراوە لەگەڵ سوپای پاسدارانی ئێران کردبوو. لەبەرانبەردا، سەرۆکی پەرلەمانی ئێران واشنتنی تۆمەتبار کرد بە هەوڵدان بۆ "خنکاندنی" وڵاتەکەی بەمەبەستی سەپاندنی سازشی زیاتر. 
هاوکات لەگەڵ ڕاگرتنی پرۆسەی دانوستانەکان، سەرۆکی ئەمریکا جەختی لەوە کردەوە کە گەرووی هورمز کراوەیە و سەرەڕای کەمیی جووڵەی بازرگانی لە کارکردندایە، بەڵام هۆشداری دا کە گەمارۆی ئەمریکا "هێشتا کارایە و بەتەواوی جێبەجێ دەکرێت". 
 ترەمپ ئاماژەی بەوەش کرد کە سەرجەم مینە دەریاییەکان لە گەرووەکە پاککراونەتەوە. پێشتریش ناوبراو هەڵوێستەکانی سەبارەت بەو ڕێڕەوە ئاوییە ستراتیژییە توندتر کردبوو، کاتێک وێنەیەکی گەرووەکەی بە ناوی "خاکی نوێی ئەمریکا" بڵاوکردەوە، لەکاتێکدا تاران پێداگرە لەسەر مەرجەکانی خۆی بۆ کردنەوەی تەواوەتیی گەرووەکە بەڕووی هاتوچۆی دەریاوانیدا.