کۆمپانیاکانی چین گواستنەوەی نەوتیان لە گەرووی هورمز و بابولمەندەب ڕاگرت

ئاژانسی ڕۆیتەرز لە زاری چەند بەرپرسێکی کەرتی گواستنەوەوە بڵاویکردەوە، کە دوو کۆمپانیای زەبەلاحی چین بەهۆی تێکچوونی ئاسایشی ناوچەکە، کەشتییەکانیان لە گەرووی هورمز و بابولمەندەب کشاندەوە. 
هەردوو کۆمپانیای "کۆسکۆ" و "سی ئێم ئی ئێس" ـی دەوڵەتیی چین، کە کۆنتڕۆڵی زیاتر لە ١٠٠ کەشتیی زەبەلاحی نەوتهەڵگر دەکەن، بڕیاریان دا چیدیکه کەشتییەکانیان نەنێرنە ناو گەرووی هورمز و بابولمەندەب و لە دەرەوەی کەنداو نەوت بار بکەن. ئەم بڕیارە دوای ئەوە هات کە حوسییەکان گەمارۆی دەریاییان دژی سعوودیە ڕاگەیاند و لێکتێگەیشتنی ئەمریکا و ئێران شکستی هێنا، کە بووەتە هۆی پەککەوتنی ڕێڕەوە ئاوییەکان. داتاکانی سەکۆی "ڤۆرتێکسا" نیشانی دەدەن کە ئەم کۆمپانیایانە بۆ تێپەڕاندنی ئەم ئاڵنگارییە ئەمنییە، ئاڕاستەی گەشتەکانیان بەرەو ڕێگەی دوورتر گۆڕیوە تاوەکو ڕێگری لە هەر زیانێک بە کەشتییەکانیان بگرن کە هەر یەکێکیان توانای گواستنەوەی دوو ملیۆن بەرمیل نەوتی هەیە. 
بەرپرسانی ئەم دوو کۆمپانیایە ئاشکرایان کردووە، کە کشانەوەی کەشتییەکانیان لە ناوچە پڕمەترسییەکان دوای ڕاوێژ لەگەڵ دەسەڵاتە ناوەندییەکانی پەکین بووە بۆ پاراستنی ئاسایشی وزەی وڵاتەکەیان. گۆڕینی ڕێڕەوی کەشتییەکان بەرەو زەریای ئەتڵەسی و کیشوەری ئەمریکا، بووەتە هۆی زیادبوونی تێچوو و کاتی چاوەڕوانی بۆ گەورەترین وڵاتی هاوردەکاری نەوت لە جیهاندا. تیمی بەڕێوەبردنی کۆمپانیاکان جەخت دەکەنەوە کە تاوەکو دۆخی ئەمنیی ناوچەکە جێگیر نەبێت، ناگەڕێنەوە بۆ ئەو ڕێڕەوانە تاوەکو متمانەی گواستنەوەی وزە بپارێزن.