فەڕەنسا ژمارەیەک دیبلۆماتکاری ئێرانی دەرکرد و؛ تارانیش دەڵێت بێ پاساوە

پەیام
فەڕەنسا بەشێک لە دیبلۆمتکارانی ئێران لە وڵاتەکەی دەرکرد، وەک کاردانەوەیەک بۆ بڕیارەکەی تاران بۆ دەرکردنی دوو دیبلۆماتکاری فەڕەنسی. 
لەبەرانبەردا وەزارەتی دەرەوەی ئێران بڕیارەکەی فەرەنسا بۆ دەرکردنی دیپلۆماتکارەکانی بەبێ پاساو وەسف کرد و بە پێشێلکردنی رێککەوتننامەی ڤیێنا ناوی برد. 
بەپێی هەواڵێکی ئاژانسی ئیسنا، ئیسماعیل بەقایی، وتەبێژی وەزارەتی دەرەوەی ئێران ڕایگەیاندووە کە تاران ڕێوشوێنی پێویستی گرتووەتەبەر دوای ئەوەی دەرکەوت باڵیۆزخانەی فەرەنسا لە تاران لە دەرەوەی بەرپرسیارێتییەکانی خۆی و یاساکانی ڕێککەوتننامەی ڤیێنا بۆ پەیوەندییە دیپلۆماسییەکان هەنگاوی ناوە. 
بەقایی ئاماژەی بەوەش کردووە کە ڕەفتارەکانی باڵیۆزخانەی فەرەنسا وەک دەستوەردانێکی ئاشکرا لە کاروباری ناوخۆیی ئێراندا سەیر دەکرێت. هەر بۆیە حکومەتی تاران بە فەرمی بڕیاری داوە ئەو دوو دیپلۆماتکارە فەرەنسییەی کە پێشێلکارییەکانیان ئەنجامداوە دەبێت خاکی ئێران جێبهێڵن و چیدیکه ڕێگە بە گەڕانەوەیان نادرێت. 
لەبەرانبەردا، پاریس وەک کاردانەوەیەک بڕیاری دەرکردنی دیپلۆماتکارە ئێرانییەکانی داوە، کە لەلایەن وتەبێژی وەزارەتی دەرەوەی ئێرانەوە بە هەنگاوێکی تەواو بێ پاساو ناوزەد کراوە و پێی وایە هەنگاوەکانی ئێران تەنیا ڕێکارێکی یاسایی بووە بەرانبەر بە سەرپێچییەکان.