6 رۆژ پێش ئێستا
202 جار خوێنراوەتەوە
گرووپێک دانانى چەک بە کشانەوەى ئەمریکا و دەرکردنى سوپاى تورکیا دەبەستێتەوە
پەیام
كەتیبەكانی سەیدولشوهەدا 10 مەرجی بۆ دانانی چەك ڕاگەیاند كە دیارترینیان كشانەوەی ئەمریكا و دەركردنی پەكەكە و سوپای توركیایە و مەرجێكیشی پەیوەندیی بە هەرێمی كوردستانەوەیە.
ئەمیندارێتی گشتیی كەتیبەكانی سەیدولشوهەدا بەشێك لە بەرەی ناسراو بە (موقاوەمەی ئیسلامی لە عێراق)، ئەمڕۆ شەممە، لە ڕاگەیەندراوێكی فەرمیدا هەڵوێستی خۆی لەسەر پرسی ڕێكخستنەوەی چەكی هێزەكانی بەرگری ئاشكرا كرد.
لە ڕاگەیەنراوەكەدا هاتووە: چەك هەڵگرتن پێویستییەك بووە و كاتێك كۆتایی دێت كە دەوڵەت توانای پاراستنی وڵاتی هەبێت.
گروپەكە 10 مەرجی سەرەكییشی بۆ پرسی چەك كە ئەو بە "ڕێكخستنی چەك" ناوی بردووە، خستووەتە ڕوو كە گرنگترینیان "كشانەوەی تەواوەتی ئەمریكایە لە وشكانی و ئاسمان، لەگەڵ كۆتاییهێنان بە هەژموونی دارایی و سیاسی واشنتۆن و داخستنی نووسینگەی نێردەی تایبەتی ئەو وڵاتە".
لە مەرجەكاندا جەخت لەسەر "دەركردنی گەریلانی پەكەكە و كشانەوەی سوپای توركیا و ئۆپۆزسیۆنی ئێرانی لە هەرێمی كوردستان كراوەتەوە بۆ ڕێگریكردن لە هێرشی وڵاتانی دراوسێ".
یەكێكی دیكە لە مەرجە سەختەكان بریتییە لە "ڕادەستكردنی پاراستنی سنوورەكانی هەرێمی كوردستان بە سوپای عێراق و كۆنتڕۆڵكردنی سەرجەم مەرزەكان لەلایەن حكومەتی فیدراڵییەوە".
كەتیبەكانی سەیدولشوهەدا داوایشی كردووە یاسای حەشدی شەعبی جێبەجێ بكرێت و سیستمی بەرگری ئاسمانی پێشكەوتوو بۆ عێراق دابین بكرێت.
ئەم هەڵوێستە مەرجدارە وەك نەخشەڕێگەیەك بۆ داهاتووی چەكی گروپەكە لە عێراقدا خراوەتە ڕوو.
لە تۆڕە کۆمەڵایەتیەکان شەیری بکە