بڵاوبوونەوەی بۆنی گۆگرد لە بەغداد بە گرفتێكی مەترسیدار ناودەبرێت

پەیام 

جارێكی دیكە بڵاوبوونەوەی بۆنی گۆگرد لە بەغداد سەری هەڵدایەوە و بەو هۆیەشەوە هۆشداری لە زیادبوونی نەخۆشییەكان دەدرێت.

ڕوانگەی ژینگەیی عێراقی سەوز هۆشداری لە دووبارەبوونەوەی بڵاوبوونەوەی بۆنی گۆگرد لە شاری بەغدادی پایتەخت دەدات و ئەوەی بە گرفتێكی ژینگەیی و تەندروستی مەترسیدار ناوبرد كە هەڕەشە لە تەندروستی هاووڵاتیان و سەلامەتیان دەكات.

ئەو ڕێكخراوە ژینگەییە ئاشكرای كرد كە بڵاوبوونەوەی بۆنی گۆگرد لە بەغداد بەهۆی سووتانی سووتەمەنی قورسی ئاستی گۆگردی بەرز لە وێستگەكانی بەرهەمهێنان و پاڵاوگەكان لەگەڵ سووتاندنی پاشماوەی پلاستیكییە، بەو هۆیەشەوە داوای وەستاندنی بەكارهێنانی سووتەمەنی خراپ لە نزیك شوێنەكانی نیشتەجێبوون دەكات.

ڕوانگەی ژینگەیی عێراقی سەوز باسی لەوە كرد "دووبارە بڵاوبوونەوەی بۆنی گۆگرد لە بەغداد بەڵگەیە لەسەر نەبوونی چارەسەری ئەو حاڵەتە و هەوكردنی بۆری هەوا و نەخۆشییەكانی هەناسەدان، بەتایبەت لەنێو منداڵان و بەساڵاچووان و تووشبووانی ڕەبۆ زیادی كردووە".