ئەمریكا هەوڵی پەكخستنی چالاكییەكانی دادگای تاوانی نێودەوڵەتی دەدات

پەیام 

ئەمریكا سزای بەسەر دادگای تاوانی نێودەوڵەتیدا سەپاند و ڕایگەیاند كە بە تەواوی چالاكییەكانی دادگاكە پەك دەخات.

تەنیا چەند كاتژمێرێك دوای ئەوەی ئەمڕۆ ناڤی پیلای، دادوەری پێشووی دادگای تاوانی نێودەوڵەتی خەڵاتی نۆبڵی ئاشتیی بەدەست هێنا، ئیدارەی ئەمریكا بە سەرۆكایەتی دۆناڵد ترمپ سزای توندی بەسەر ئەو دادگایەدا سەپاند. 

ماركۆ ڕوبیۆ، وەزیری دەرەوەی ئەمریكا، دادگاكەی بە "مەترسیدار" ناوبرد و ڕایگەیاند كە واشنتن چیتر ڕێگە نادات دادگاكە ئەمریكییەكان دادگایی بكات. 

بەپێی ئەم بڕیارە، ئەمریكا هەر جۆرە مامەڵەیەكی دارایی و بازرگانی لەگەڵ دادگاكە قەدەغە دەكات و هەوڵ دەدات سەرچاوە داراییەكانی ببڕێت بۆ ئەوەی بە تەواوی چالاكییەكانی پەك بخات.

واشنتن دەڵێت ئەم هەنگاوە بۆ پاراستنی سەروەریی ئەمریكا و هاووڵاتییانیەتی، بەتایبەت دوای ئەوەی دادگاكە بڕیاری دەستگیركردنی بۆ ژمارەیەك بەرپرسی ئیسرائیلی دەركرد و لێكۆڵینەوەشی لەسەر كردەوەكانی سەربازانی ئەمریكا لە ئەفغانستان دەست پێكرد. 

ئەگەرچی وەزارەتی گەنجینەی ئەمریكا هەندێك مۆڵەتی سنووردار و كاتی بۆ هەندێك كاری پەیوەست بە دادگاكە دەرهێناوە، بەڵام ڕوبیۆ هۆشداری دا كە ئەگەر دادگاكە دەست لە هەڕەشەكانی هەڵنەگرێت، ئەمریكا بەردەوام دەبێت لە تووندكردنی سزاكان. 

واشنتن داواشی لە هاوپەیمانانی كردووە كە فشار بخەنە سەر ئەو دادگایە و پابەند نەبن بە بڕیارەكانی دژی ئەمریكا و ئیسرائیل.