ئەو بۆمبانەی نراون بە غەززەوە، هێزەكەیان یەكسانە بە شەش بۆمبی ئەتۆمی

پەیام 

نەتەوە یەكگرتووەكان ئاشكرای دەكات، هێزی ئەو بۆمبانەی ئیسرائیل دژی غەززە بەكاریهێناون، یەكسانە بە شەش بۆمبی ئەتۆمی.

فرانچێسكا ئەلبانیزی، بڕیاردەری نەتەوە یەكگرتووەكان بۆ مافەكانی مرۆڤ لە خاكە فەڵەستینییەكان، دۆخی كەرتی غەززەی بە "زۆر دڵتەزێن" وەسف كرد و جەختی كردەوە كە دانیشتووانی كەرتی غەززە ڕووبەڕووی "مەرگێكی هێواش" بوونەتەوە. 

ئەلبانیزی لە لێدوانێكدا ڕایگەیاند، ئەو بۆمبانەی لە 3 ساڵی ڕابردوودا ئاراستەی غەززە كراون، هێزەكەیان یەكسانە بە شەش بۆمبی ئەتۆمی.

بەپێی ئامارە فەرمییەكان، ئیسرائیل زیاتر لە 223 هەزار تۆن بۆمبی بەكارهێناوە، كە بووەتە هۆی شەهیدبوونی زیاتر لە 74 هەزار كەس و برینداربوونی 157 هەزار كەسی دیكە.

ئەم بەرپرسە نێودەوڵەتییە ئاماژەی بەوەش كرد، یەك ملیۆن و 800 هەزار فەڵەستینی ناچار كراون لە كەمتر لە 30%ی ڕووبەری غەززەدا كۆ ببنەوە، ئەمەش بووەتە هۆی بڵاوبوونەوەی نەخۆشی و كەمی خۆراك. 

ناوبراو ڕەخنەی توندی لە فشارەكانی ئەمریكا گرت كە بووەتە هۆی پاشەكشەی هەندێك وڵات لە "گرووپی لاهای" بۆ بەرگریكردن لە یاسا نێودەوڵەتییەكان. 

ئەلبانیزی كە خۆی ڕووبەڕووی فشارێكی زۆر بۆتەوە تا دەست لەكار بكێشێتەوە، دووپاتی كردەوە كە كەرتی تەندروستی لە غەززە بە تەواوی داڕماوە و هیچ كاڵایەك هاوردە ناكرێت، و چارەسەری سیاسیش بۆ دۆخەكە بەدی ناكرێت.