ئاوەدانكردنەوەی كەرتی غەززە پێویستی بە زیاتر لە 70 ملیار دۆلارە

پەیام 

حكومەتی فەڵەستین ڕایگەیاند، پرۆسەی ئاوەدانكردنەوەی كەرتی غەززە پێویستی بە زیاتر لە 70 ملیار دۆلار هەیە.

عاهد بەسیسۆ، وەزیری كاری گشتی و نیشتەجێكردنی فەڵەستین ڕایگەیاند، بەپێی دوایین ڕاپۆرتی هاوبەشی بانكی نێودەوڵەتی، یەكێتی ئەوروپا و حكومەتی فەڵەستین، تێچووی ئاوەدانكردنەوەی غەززە بە 71.4  ملیار دۆلار مەزەندە كراوە.

ئەمە لە كاتێكدایە كە جەنگ چوارەمین ساڵی خۆی تێدەپەڕێنێت و زیاتر لە 81%ی باڵەخانەكانی كەرتی غەززە وێران بوون، كە تەنها زیانی بەشی نیشتەجێبوون 18 ملیار دۆلارە.

بەگوێرەی ئامارەكان، 372 هەزار یەكەی نیشتەجێبوون بەتەواوی لەناو چوون و 68 ملیۆن تۆن خاشاك و داروپوردوو لە شارەكەدا كۆ بووەتەوە، كە لابردنیان زیاتر لە 20  ساڵی پێویستە.

 جگە لە وێرانبوونی ژێرخانی ئابووری، پەروەردە و تەندروستی، ژمارەی شەهیدان بۆ 74 هەزار كەس بەرز بووەتەوە و زۆربەی زەوییە كشتوكاڵییەكان لەناو چوون.

 ڕێكخراوی تەندروستی جیهانیش هۆشداری دەدات لەوەی بەردەوامیی كێشەی دەرمان و پێداویستییە پزیشكییەكان، دۆخەكە بەرەو كارەساتێكی گەورەتر دەبات.