جیبۆتی.. 109 كۆچبەر گیانیانلەدەستدا و 116ی دیكەش بێسەروشوێنن

پەیام 

لە ئەنجامی ژێرئاكەوتنی بەلەمێك  لە نزیك كەناراوەكانی جیبۆتی، 109 كۆچبەری ئەسیوبی گیانیان لەدەست داوە و 116ی دیكەش بێسەروشوێن بوون. 

لە بەیاننامەیەكدا، ڕێكخراوی نێودەوڵەتیی كۆچ ئاشكرای كرد كە بەلەمەكە لە كاتی گەشتكردنیدا لە جیبۆتییەوە بەرەو یەمەن، لە باكووری ناوچەی ئۆبۆك لە شەوی هەشت لەسەر نۆی ئەم مانگە وەرگەڕاوە و تەواوی سەرنشینەكانی كەوتوونەت دەریاوە.

ڕێكخراوەكە ڕوونی كردەوە كە تەرمی 109 كۆچبەر دۆزراونەتەوە كە پێكهاتوون لە 52 پیاو، 42 ژن و 15 منداڵ، هاوكات 80 كەس لە كارەساتەكە ڕزگار كراون كە سەرجەمیان هاووڵاتیی ئەسیوبین، لە كاتێكدا تیمەكانی فریاكەوتنی جیبۆتی بەردەوامن لە گەڕان بەدوای چارەنووسی 116 بێسەروشوێنبووەكەی دیكەدا. 

بەپێی زانیارییەكانی دەزگاكانی كۆچ، ساڵانە دەیان هەزار كۆچبەر لە ئەفریقاوە بە مەبەستی گەیشتن بە وڵاتانی كەنداو و دەستكەوتنی هەلی كار، لە ڕێگەی جیبۆتی و پەڕینەوە لە بابولمەندەبەوە دەچنە ناو یەمەن، و تەنیا لەمساڵدا زیاتر لە 20 هەزار كۆچبەر لە ئەسیوبیاوە گەیشتوونەتە جیبۆتی.

ئەم ڕووداوە لە كاتێكدایە كە كۆچبەران سەرەڕای ئاڵۆزییە ئەمنییەكانی ناوچەكە بەردەوامن لە گرتنەبەری ئەم ڕێڕەوە دەریاییە، كە بەپێی ئامارە فەرمییەكان تەنیا لە ساڵی 2025دا زیاتر لە 900 كۆچبەر لە درێژایی ئەم ڕێڕەوەدا گیانیان لەدەست داوە یان بێسەروشوێن بوون.