حووسییەکان: فڕۆکەخانەی مەلیک خالد و پاڵاوگەی ئارامکۆمان بە ئامانج گرت

پەیام

وتەبێژی سەربازیی بزووتنەوەی ئەنسارووڵای حووسییەکان ڕایگەیاند کۆمپانیای ئارامکۆ لە زەهران و، فڕۆکەخانەی نێودەوڵەتیی مەلیک خالید و پاڵاوگەی ئارامکۆیان لە ڕیاز بە ئامانج گرتووە و، جەختیشی کردەوە لە بەردەوامیی پەلامارەکانیان. 
بەپێی ڕاگەیەندراوی وتەبێژی سەربازیی حووسییەکان، ئۆپراسیۆنە مەیدانییەکانیان لە قووڵایی خاکی سعودیە بەردەوام دەبن و لە ڕۆژانی داهاتوودا فڕۆکەخانەکان و دامەزراوە نەوتییەکان دەکەنە ئامانجی ڕاستەوخۆی هێرشەکانیان. 
ئەم پەرەسەندنە سەربازییەی نێوان هاوپەیمانیی عەرەبی و گرووپی حووسی لە کاتێکدا بەردەوامە کە بەرگریی شارستانیی سعودیە برینداربوونی چوار کەس و زیانی لە ١٥ ماڵی لە شاری ڕیاز ڕاگەیاند، ئەوەش بەهۆی کەوتنەخوارەوەی پارچە و پاشماوەی مووشەکێکی کروزەوە کە لە ئاسماندا تێکشکێنرابوو. 
لەلایەکی دیکەشەوە، وەزارەتی وزەی سعودیە ڕایگەیاند ئاگر لە باڵەخانەیەکی کۆمپانیای ئارامکۆ لە زەهران کەوتوەتەوە کە بەهۆی پێکانی مووشەکێکەوە بوو، وەزارەتەکە ئاماژەی بەوەش کردووە کە ئاگرەکە بێ هیچ زیانێکی گیانی کۆنتڕۆڵ کراوە.