ترەمپ هێرشەكانی ئۆكرانیا بۆ سەر پاڵاوگەكانی نەوتی ڕووسیا شەرمەزار دەكات

پەیام

سەرۆكی ئەمریكا دەستپێكردنەوەی هێرشەكانی ئۆكرانیا بۆ سەر پاڵاوگەكانی نەوتی ڕووسیا بە «شەرمەزاری» وەسف دەكات.

دۆناڵد ترەمپ، سەرۆكی ئەمریكا دەستپێكردنەوەی هێرشەكانی ئۆكرانیای بۆ سەر پاڵاوگەكانی نەوتی ڕووسیای بە «شەرمەزاری» ناوبرد و ڕایگەیاند كە ئەو لێدانانە دەبنە هۆی بەرزبوونەوەی نرخی وزە لە جیهاندا، لە كاتێكدا هەوڵەكانی واشنتۆن بۆ كۆتاییهێنان بە جەنگ بەردەوامن.

ترەمپ لە چاوپێكەوتنێكدا لەگەڵ كەناڵی "نیوزماكس" ئاماژەی بەوە كرد، بەئامانجگرتنی ئەو پاڵاوگانەی كە گازوایل بەرهەمدەهێنن خزمەت بە بەرژەوەندییەكانی جیهان ناكات، چونكە بازاڕ پێویستی بەو سووتەمەنییە هەیە. 

ئەم لێدوانە دوای ئەوە هات كە ئۆكرانیا هێرشی كردە سەر پاڵاوگەیەكی كۆمپانیای "ڕۆزنەفت" لە باشووری ڕۆژهەڵاتی مۆسكۆ. 

هێرشەكەش دوای ئەوە ئەنجام درا كە ڤۆلۆدیمیر زیلینسكی كشانەوەی لە ئاگربەستی كەرتی وزە ڕاگەیاند، كە ترەمپ پێشتر پێشنیازی كردبوو.

لە بەرامبەردا، ڕووسیاش بەردەوامە لە بۆردومانكردنی وێستگەكانی كارەبا لە ئۆكرانیا بە مووشەك و فڕۆكەی بێفڕۆكەوان، بەهۆیەوە سەدان هەزار هاووڵاتی بێ كارەبا ماونەتەوە. 

هاوكات ترەمپ دانی بەوەدانا مامەڵەكردن لەگەڵ زیلینسكی زۆر قورسترە بەراورد بە ڤلادیمیر پوتین، و ئاشكرای كرد گفتوگۆ لەگەڵ ڕووسیا و چین لەسەر پرسی چەكداماڵینی ئەتۆمی ئەنجام دەدەن.