ئەمریكا داوای هەڵوەشاندنەوەی یاسایەكی 71 ساڵەی بایكۆتكردنی ئیسرائیل لە لوبنان دەكات

پەیام

ئەمریكا فشارەكانی لەسەر لوبنان توند دەكاتەوە بۆ هەڵوەشاندنەوەی یاسای بایكۆتكردنی ئیسرائیل كە بۆ 71 ساڵ لەمەوبەر دەگەڕێتەوە.

بە پاساوی ئەوەی بۆ دادگاییكردنی سیاسی بەكاردێت و ڕێگری لە پرۆسەی ئاشتی دەكات، ئەمریكا گوشارەكانی بۆ سەر لوبنان چڕ كردووەتەوە تاكو یاسای بایكۆتكردنی ئیسرائیل، كە لە ساڵی 1955ـەوە كاری پێدەكرێت هەڵبوەشێنێتەوە. 

ئەم هەنگاوە هاوكاتە لەگەڵ ناڕەزایەتیی توندی واشنتۆن بەرانبەر ڕەوانەكردنی نیدا حەمادە موعەوەز، باڵیۆزی لوبنان لە ئەمریكا بۆ بەردەم دادگای سەربازیی وڵاتەكەی، بەهۆی بەشداریكردنی لە دانوستانە سێقۆڵییەكاندا.

بەرپرسێكی وەزارەتی دەرەوەی ئەمریكا ئاشكرای كرد ماركۆ ڕوبیۆ، وەزیری دەرەوە لە پەیوەندییەكدا لەگەڵ جۆزێف عۆن، سەرۆكی لوبنان ئەم پرسەی ورووژاندووە، و ڕایگەیاندووە یاساكە لەم قۆناغەدا گونجاو نییە، هاوكات داوای پەیوەندیی سەربازیی ڕاستەوخۆی لە نێوان سوپای لوبنان و ئیسرائیلدا كردووە بۆ ڕێگری لە پێكدادان. 

واشنتۆن جەختی لەوەش كردووەتەوە دەبێت ئەو یاسایانە نەمێنن كە لێپرسینەوەی سیاسی دەسەپێنن و پارێزگاری لە چەكدارانی حزبوڵڵا دەكەن.

یاسای حوزەیرانی ساڵی 1955ی لوبنان، ڕێككەوتن لەگەڵ هەر كەس یان دەزگایەكی نیشتەجێی ئیسرائیل بە قەدەغە دادەنێت، و سزاكەی لە 3 بۆ 10 ساڵ زیندانیی بەكاری قورس و سزای دارایی دیاری كردووە.