ئاسیاسێڵ و سامسۆنگ ڕێككەوتنێكی هاوبەشی ستراتیژییان واژۆ كرد

پەیام

كۆمپانیای ئاسیاسێڵ و سامسۆنگ ئەلەكترۆنیكس لیڤانت ڕێككەوتنێكی هاوبەشی ستراتیژییان بۆ دابینكردنی نوێترین ئامێر و چارەسەرە تەكنەلۆژییەكان لە سەرتاسەری عێراقدا واژۆ كرد. 

بەپێی ڕاگەیەندراوی كۆمپانیاكە لە چوارچێوەی ئەم هاوبەشییەدا بەشداربووان لە ڕێگەی كەناڵەكانی ئاسیاسێڵەوە دەستیان بە ئۆفەری تایبەت، بژاردەی قیست و پڕۆگرامی گۆڕینەوەی ئامێرە كۆنەكانیان بە مۆدێلی نوێی سامسۆنگ دەگات. 

هاوكات هەردوولا پێكەوە كار دەكەن بۆ دابینكردنی چارەسەری ئەلیكترۆنی بۆ دامەزراوە و كۆمپانیاكان بە پاڵپشتیی سیستەمی ئەمنیی "سامسۆنگ نۆكس گارد"، لە پاڵ ڕاهێنانی تیمەكانی فرۆشتن لە ڕێگەی بەرنامەی ڕاوێژكاریی باوەڕپێكراوی سامسۆنگ تا باشترین پشتگیری پێشكەش بە بەكارهێنەران بكرێت. 

عامر سوناع، بەڕێوەبەری جێبەجێكاری كۆمپانیای ئاسیاسێڵ ڕایگەیاند كە ئەم هاوبەشییە هەنگاوێكە بۆ خێراكردنی داهاتووی دیجیتاڵیی عێراق و بەردەستكردنی تەكنەلۆژیای جیهانیی ژیریی دەستكرد بۆ سەرجەم هاووڵاتییان.

هەروەها جۆنگهۆ كانگ، سەرۆكی كۆمپانیای سامسۆنگ ئەلەكترۆنیكس لیڤانت جەختی كردەوە، كە ئەم قۆناغە نوێیە وایان لێدەكات نوێترین داهێنانەكانی سامسۆنگ بگەیەننە بەكاربەران لە سەرانسەری عێراقدا.