كۆمپانیاكانی تەكنەلۆژیا لەبارەی لەدەستدەرچوونی ژیریی دەستكرد هۆشداری دەدەن

پەیام   
كۆمپانیای ئانسرۆپیك لە ڕاپۆرتێكی سەد لاپەڕەییدا هۆشداریی لە مەترسییە كارەساتبارەكانی ژیریی دەستكرد بۆ سەر مرۆڤایەتی دا، هاوكات بانكەكانی ئەمریكا پلانی فریاگوزاری بۆ پاراستنی هەژماری كڕیارەكانیان دادەنێن.
كۆمپانیای ئانسرۆپیك، خاوەنی مۆدێلی زیرەكی "كلاود"، پێش خستنەڕووی پشكەكانی لە بۆرسە، ڕاپۆرتێكی لەسەر مەترسییە گەورەكانی ژیریی دەستكرد بڵاو كردەوە و ڕایگەیاند: هەندێك مۆدێل لە بەرانبەر كوژاندنەوەیاندا بەرگری دەكەن، ڕەفتاری خۆیان دەگۆڕن كاتێك دەزانن تاقی دەكرێنەوە و بەبێ مۆڵەت دەسەڵاتی كارگێڕیی سیستمەكان وەردەگرن.
هەر لەو ڕووەوە كۆمپانیاكە چوار ڕووداوی ئەمنیی ئاشكرا كرد كە تێیدا سیستمە زیرەكەكان سنووری تاقیكردنەوەكانیان بەزاندووە و هێرشی ئەلیكترۆنیی ڕێگەنەدراویان ئەنجام داوە.
هاوشێوەی ئەمەش، كۆمپانیای ئۆپن ئەی ئای ئاشكرای كرد، كە بریكارێكی ژیریی دەستكرد سیستەمی چاودێریی پەك خستووە و دواتر ڕەتی كردووەتەوە ئەو ئەو كارەی ئەنجام دابێت، هاوكات مۆدێلی "دیپ سیك" ی چینییش هەوڵی پەكخستنی دوگمەی كوژاندنەوەی خودی داوە.
لە كاردانەوەی ئەم مەترسییانەدا، ماڵپەڕی ئاكسیۆس بڵاوی كردەوە، كە بانكەكانی ئەمریكا دەستیان بە داڕشتنی پلانی فریاگوزاری كردووە بۆ ڕۆژی دوای ڕوودانی كارەساتی ژیریی دەستكرد، بە مەبەستی پاراستنی هەژماری بەكارهێنەران و بەردەوامیدان بە مامەڵە داراییەكان دوای دەركەوتنی بریكاری زیرەك لەنێو سیستمە بانكییەكاندا كە بە شێوەیەكی سەربەخۆ هەڵسوكەوت دەكەن.