وه‌زیری ناوخۆی فه‌ڕه‌نسا: له‌ هه‌ندێك شاردا خۆپیشاندانه‌كان له‌ كۆنتڕۆڵ ده‌رچوون

وەزیری ناوخۆی فەرەنسا دان بەوەدا دەنێت کە توندوتیژەکانی ئەم دواییەی وڵات لە کۆنتڕۆڵ دەرچوون و ژمارەی پۆلیسیش لە ئاست پێویستدا نەبووە، ئەمەش لە کاتێکدایە کە لە سەرجەم شارەکاندا نزیکەی نیو ملیۆن کەس دژی گرانبوونی گوزەران ڕژاونەتە سەر شەقامەکان. 
لۆران نونیز، وەزیری ناوخۆی فەرەنسا، لە چاوپێکەوتنێکیدا لەگەڵ ڕادیۆی (فرانس إنتر) دانی بەوەدا نا کە ناڕەزایەتییە جەماوەرییەکان لە کۆنتڕۆڵ دەرچوون و ئاماژەی بەوەش دا کە ژمارەی هێزەکانی پۆلیس لەگەڵ گەورەیی خۆپیشاندەراندا هاوسەنگ نەبووە. 
خۆپیشاندانەکان لە چەند ناوچەیەکدا گرژی و پێکدادانی توندیان لەگەڵ هێزەکانی پۆلیس لێکەوتەوە و توندوتیژی و تێکدان و دزینی بەدوای خۆیدا هێنا، بە جۆرێک کە گروپە توندڕەوەکان دەستیان کرد بە شکاندنی شووشەی دوکانەکان. لەبەرانبەردا، هێزەکانی پۆلیس بۆ بڵاوەپێکردنی جەماوەر پەنایان بردە بەر بەکارهێنانی گازی فرمێسکڕێژ، بۆمبی دەنگی. 
بەگوێرەی ئامارە فەرمییەکان، کۆی گشتیی بەشداربووانی ئەم خۆپیشاندانانە لە سەرانسەری وڵاتدا گەیشتە نزیکەی ٥٥٠ هەزار کەس، و لە ئەنجامی توندوتیژییەکانیشدا زیاتر لە ٢ هەزار کەس دەستگیر کراون، هاوکات سەرووی ٦٠٠ کەس لە ئەندامانی هێزە ئەمنییەکان و کارمەندانی ئاگرکوژێنەوە بریندار بوون.