بانکی ناوەندی: یەدەگی دراوی عێراق بۆ نزیکەی ٨٠ ملیار دۆلار بەرزبووەوە

بانکی ناوەندیی عێراق بووژانەوەی یەدەگی دراوی بیانیی بۆ نزیکەی ٨٠ ملیار دۆلار ڕاگەیاند، هاوکات سەرۆکوەزیرانیش بە شێوەیەکی ڕاستەوخۆ سەرپەرشتیی گەیشتنی فڕۆکەکانی باری دۆلاری کاش دەکات. 
لە لێدوانێکدا بۆ ئاژانسی هەواڵی عێراقی، مەحموود داغر، ڕاوێژکاری پارێزگاری بانکی ناوەندیی عێراق ئاشکرای کرد کە کۆی یەدەگی دۆلاری وڵات لە ٧٣ ملیار دۆلارەوە بۆ نزیکەی ٨٠ ملیار دۆلار بەرزبووەتەوە، هاوکات یەدەگی زێڕیش بە نەگۆڕی لەسەر ١٧٠ تۆن ماوەتەوە. داغر هۆکاری ئەم بووژانەوەیەی بۆ بەرزبوونەوەی داهاتی هەناردەی نەوتی مانگەکانی ئەیلوول و تشرینی یەکەم گەڕاندەوە کە مانگانە گەیشتووەتە نزیکەی شەش ملیار دۆلار، هەروەها دڵنیایی دا کە دۆلاری نەختینەیی لە بانکەکە بە تەواوی بەردەستە و بەو هۆیەوە پشکی گەشتیاران بۆ شەش بەشی ساڵانە زیاد کراوە. 
داغر ئاماژەی بەوە کرد بەپێی ڕێنماییەکانی عەلی فالح زەیدی، سەرۆکوەزیرانی عێراق کە خۆی بەدواداچوون بۆ گەیشتنی پارە دەکات، دوو فڕۆکەی دۆلاری کاش بە باری نزیکەی نیو ملیار دۆلار بۆ هەر یەکێکیان گەیشتوونەتە بەغدا و لە ڕۆژانی داهاتووشدا باری دیکە دەگات. ڕاوێژکارەکەی بانکی ناوەندی جەختی لەوە کردەوە کە دوای دابەزینی توانای یەدەگ بەهۆی پەککەوتنی هەناردەی نەوت لە مانگەکانی نیسان و ئایاردا، لە ئێستادا یەدەگی دراو گەڕاوەتەوە بۆ ئاستی پێشووی خۆی بۆ پاڵپشتیکردنی بازرگانیی دەرەکیی وڵات.