دەستەی گەیاندن هێڵەكانی كۆڕەكی لە بەغدا ڕاگرت و كۆمپانیاكەش داوای قەرەبوو دەكات

پەیام  
دەستەی ڕاگەیاندن و گەیاندنی عێراق هێڵەكانی كۆڕەك تیلیكۆمی لە بەغداد ڕاگرت، كۆمپانیاكەش دەستەكە بە سەرپێچیكردنی بڕیاری دادگا تۆمەتبار دەكات.
بەپێی بڕیاری دەستەی ڕاگەیاندن و گەیاندنی عێراق، لە ئەمڕۆوە سەرجەم هێڵەكانی كۆمپانیای كۆڕەك تیلیكۆم لە بەغدای پایتەخت لە خزمەتگوزاری خران و بڕیارە ئەم هەنگاوە لە ڕۆژانی داهاتووشدا قۆناغ بە قۆناغ سەرجەم پارێزگاكانی دیكە بگرێتەوە.
لە بەرانبەردا، كۆمپانیای كۆڕەك تیلیكۆم لە بەیاننامەیەكی فەرمیدا بڕیارەكەی سەرۆكی جێبەجێكاری دەستەكەی بۆ هەڵوەشاندنەوەی ڕێككەوتنی دارایی بە نایاسایی و ستەمكارانە داناوە و دەڵێت: لە كاتێكدا دادگای عێراق بڕیاری بە كاركردنی دەستبەجێی بە گرێبەستەكە دابوو.
كۆڕەك دەشڵێت: دەستەی گەیاندن پابەندی حوكمی دادگا نەبووە و بە مەبەست هێڵەكانی بڕیوە و بارەگاكانی داخستووە، بۆیە مافی یاسایی خۆمانە داوای قەرەبووی سەرجەم ئەو زیانانە بكەین كە بەر كۆمپانیاكە و بەشداربووانی كەوتوون.
چەند ڕۆژ پێشتر بەلیغ ئەبو كەلەل، سەرۆكی دەستەی ڕاگەیاندن و گەیاندنی عێراق ڕایگەیاندبوو گەڕانەوەی كۆڕەك بەستراوەتەوە بە هێنانی ئەستۆپاكی باج لە وەزارەتی دارایی و پێدانی 500 ملیار دینار وەك قیستی یەكەمی قەرزەكانی كە لە دوو تریلیۆن دینار تێدەپەڕێت، ڕایشیگەیاند: بەو مەرجانە ئامادەیی گرێبەستی نوێ دەبین.