سەرایا سەلام بە فەرماندەی گشتیی هێزە چەكدارەكان دەبەسترێتەوە

پەیام

حكوومەتی عێراق بڕیاری دا سەرایا سەلام لە حەشدی شەعبی جیا بكاتەوە و بیبەستێتەوە بە فەرماندەی گشتی.
سەرچاوەیەكی ئەمنیی باڵا لە نێو سەرایا سەلام لە لێدوانێكدا بۆ ئاژانسی بەغداد ئەلیەوم ئاشكرای كرد، بڕیارێكی حكوومی دراوە بە مەبەستی جیاكردنەوەی تەواوی پێكهاتەكانی سەرایا سەلام لە دەستەی حەشدی شەعبی و بەستنەوەی ڕاستەوخۆیان بە نووسینگەی فەرماندەی گشتیی هێزە چەكدارەكانەوە.
سەرچاوەكە ڕوونی كردەوە كە ئەم هەنگاوە دوای ئەوە دێت كێشەی گەورە لەسەر گواستنەوەی هێزەكانیان دروست بووە، هاوكات چەند لایەنێكی دەستڕۆیشتوو لە ناو حەشد هەوڵیان داوە لە ڕێگەی دابەشكردنی چەكدارانی سەرایا بەسەر لیواكانی دیكەدا، پێكهاتەكەیان هەڵبوەشێننەوە و پەرتی بكەن.
سەرچاوە ئەمنییەكە ئاماژەی بەوەش كرد، سەرایا سەلام لە ڕابردوودا دەستپێشخەر بووە لە ڕادەستكردنی چەكەكانی بە دەوڵەت، بۆیە شتێكی ئاسایییە كە لەمەودوا ڕاستەوخۆ فەرمان لە نووسینگەی فەرماندەی گشتی وەربگرێت و لەژێر دەسەڵاتی ئەودا كار بكات.
بەپێی زانیارییەكانی هەمان سەرچاوە، سەرەڕای ئەم بڕیارە سەربازییە، هێزەكانی سەرایا سەلام لە ماوەی ئێستادا لە ناو شاری سامەڕا دەمێننەوە و بەردەوام دەبن لە ئەركەكانیان بۆ پاراستنی سەقامگیری و مەزارگە پیرۆزەكان، تا ئەو كاتەی ڕێنماییی نوێ لە سەركردایەتییەوە ئاراستەی هێزەكان دەكرێت.