دوای لادانی شەتری، زەیدی سەرۆكایەتیی دەزگای هەواڵگری گرتە ئەستۆ

پەیام

دوای لادانی حەمید شەتری، سەرۆكوەزیرانی عێراق بەشێوەیەكی فەرمی ئەركی سەرۆكایەتیی دەزگای هەواڵگریی نیشتمانیی وڵاتەكەی گرتە ئەستۆ.
سەباح نەعمان، وتەبێژی فەرماندەی گشتیی هێزە چەكدارەكان ڕایگەیاند كە عەلی زەیدی، سەرۆكوەزیرانی عێراق لە میانی سەردانێكیدا بۆ بارەگای دەزگای هەواڵگری، ڕاستەوخۆ سەرپەرشتیی ئەم دەزگایەی گرتووەتە ئەستۆ، ئەوەش لەبەر ڕۆشنایی ئاستی ئاڵنگارییە هەنووكەییەكان و هاوكات لەگەڵ پلانی تەواوكردنی سەروەریی نیشتمانی.

لە میانەی كۆبوونەوەی لەگەڵ سەركردە و ئەفسەرانی دەزگاكەدا، زەیدی جەختی لەوە كردەوە كە دەزگای هەواڵگری هی تەواوی عێراقییەكانە و دەبێت بە تەواوی لە پشكپشكێنەی حزبی، مەزهەبی و تائیفی دوور بخرێتەوە، چونكە بە قەڵغانی پاراستنی وڵات دادەنرێت.
هەروەها سەرۆكوەزیران ستایشی قوربانیدانی دەزگاكەی كرد و بەڵێنی دابینكردنی هەموو پێداویستییەكان و پەرەپێدانی تواناكانیانی بە شێوازی سەردەمیانەی زانستی دا لە پێناو بەرەنگاربوونەوەی تەنگژە هەرێمییەكان.

ئەم بڕیارەش دوای ئەوە هات كە زەیدی فەرمانێكی دیوانی دەركرد بۆ كۆتاییهێنان بە ئەركی حەمید شەتری لە سەرۆكایەتیی دەزگاكەدا، كە لە سەردەمی حكوومەتەكەی محەمەد شیاع سوودانی لە ساڵی 2024 دەستبەكار ببوو.